Осы тақырыппен бүгін Қандыағаш қалалық №4 орта мектебінде әкелер мен ер балалар жиналысы өтті.
Баланың бойындағы ер мінезділік, өжеттілік, мәрттік қасиеттерді әке арқылы қалыптастыру, әке мен бала арасында тығыз байланыс орнатуға бағыт беру, әкенің рөлі ерекше екенін ұғындыру және балалар мен жасөспірімдер арасында құқықбұзушылықтың алдын алуды мақсат еткен шара кең көлемде ұйымдастырылды. Мектеп ауласына киіз үй құрылып, келушілерді ұлт-аспаптар оркестрі күмбірлеген күймен қарсы алды.
Жиынға балалар және жасөспірімдер спорт мектебінің басшысы Қарасай Омаров, Мұғалжар аудандық тарихи-өлкетану музейінің директоры Шамшат Әбдірзақов, ауған соғысының ардагерлері Роман Тасқымбаев пен Жайық Досмағұлов, полиция майоры Мұратбек Дүйсенбаев және әкелер мен мектеп оқушылары қатысты.
Келген жиын қонақтары ер балаларға ақыл-кеңестер айтып, әкенің отбасындағы рөліне тоқталып өтті. Сондай-ақ мектеп оқушылары тарапынан сұрақтар қойылып, сол сұрақ төнірігінде әңгімелер өрбіді.
Әкелер мен балалалар жиналысы әрі қарай «Ұлттық ойын — халық мұрасы» атты ұлттық ойын түрлерінен жарысқа ұласты. Әкелер мен ер балалар арасында гір көтеру, қол күрес, арқан тартыс секілді ойындар өткізіліп, жеңімпаздар марапатталды.
АҒАШ ТАМЫРЫМЕН, АДАМ ҰРПАҒЫМЕН МЫҚТЫ
