КӨРІСУ КҮНІ АТАЛЫП ӨТТІ
14 наурыз Көрісу күні аудан әкімінің орынбасары Әкімжан Есенаманов және аудандық мәдениет үйінің қызметкерлері қала аумағындағы мекемелерді аралап, жұмысшы мамандық иелеріне көрісіп, мерекелік көңіл-күй сыйлады. Ардагерлерді ардақтаған өнерпаздар алдымен аудандық ардагерлер кеңесіне бас сұғып, ақсақалдардың батасын алды. Содан кейін «Коммуналшы», «Неохим», «Мирас» өндіріс орындарына барып, еңбек адамдарымен көрісіп, ән мен жырдан шашу шашты.
Орталық базардағы сатушыларға да көрісіп барған өнер иелері жарапазан айтып, келушілерді де мерекемен құттықтап, жылы лебіздерін білдірді. Бұл күні «Ақтөбе облыстық ерікті мүгедектер қоғамының Мұғалжар аудандық филиалы» қоғамдық бірлестігінің төрайымы Әлия Умарова бастаған қоғам мүшелері де қазыналы қарттарды Көрісу мерекесімен құттықтады. Олардың қатарында аудандық аурухананың зейнеткері Кендебай Қалмұратов, Мүгедектер қоғамының зейнеткері Марзия Хасанова, ветеринариялық станция зейнеткері Гүлмира Құдайбергенова, шахмат ойынының спорт шебері, зейнеткер Тельман Утепбергенов, теміржол саласының зейнеткері Сағынтай Кенесарин болды.
Ардагерлер құттықтап келушілердің жұмыстарына жеміс тілеп, ақ батасын берсе, қоғам мүшелері бүгінгі буынға осындай дәстүрдің қаймағын бұзбай жеткізген ақсақалдарға алғысын айтты. Ал Ембі қалалық кітапханасының қызметкерлері «Жұмысшы мамандықтары жылы» аясында және Амал мерекесіне орай жұмысшылардың қоғамдағы орнының маңызына мән арттырып, жұмыстарынаалғыс айту мақсатында еңбек адамдарына арнайы барып, көрісті. Олардың арасында «Энергосистема» ЖШС-і ЭЖУ мен «Сервис» ТЖО-ның, «Қазақтелеком» АҚның, Жем вагондарға қызмет көрсету бекетінің ұжымдары мен ақылы қоғамдық жұмыста еңбек ететінжандар бар.
Сонымен қатар кітапханашылар «Қазпошта» ұжымы мен Мұғалжар аудандық оқушылар шығармашылығындамытуорталығықызметкерлеріне де мерекелік көңілкүй сыйлап, ыстық шәй мен бауырсақтар үлестіріп, Амал мерекесімен құттықтады.
ҚАЙЫРЫМДЫЛЫҚ КҮНІ: ИГІ ІСТЕР ЖАСАЛДЫ
15 наурыз — Қайырымдылық күні «Наурызнама» тұжырымдамасы аясында өткізіліп жатқан игі шараға Мұғалжар аудандық тарихи-өлкетану музейінің ұжымы да өз үлестерін қосты. Шамшат Әбдірзақ бастаған ұжым қала кәсіпкерлерімен бірлесіп, аз қамтылған үш отбасына азық-түлік апарып берді. Қайырымдылық шарасына «Әйгерім» және «Адал маркет» дүкендерінің иелері атсалысты. Мұғалжар аудандық білім бөлімінің жанынан құрылған «Ұшқын» жас ұстаздар ұйымы да «Қайырымдылық жасау» күніне өз үлестерін қосты. Олар «Аяла» арнаулы әлеуметтік қызметтерге мұқтаж балаларды қолдау орталығына барып, балаларға сый-сияпат жасап, көңіл-күйлерін көтеріп, қуаныш сыйлады.
Мұғалжар аудандық білім бөлімінің басшысы Бахраман Аманжол да жастармен бірге игі іске қатысып, өзінің жылы лебізін білдірді.
ШАҢЫРАҚ КҮНІ: ҮЛГІЛІ ОТБАСЫЛАРДЫҢ ӨНЕГЕСІ
16 наурыз — аңырақ күнінде Мұғалжар аудандық тарихи-өлкетану музейінің қызметкерлері Қандыағаш қаласының тұрғындары Қонақовтардың отбасына барды. Бір шаңырақ астында 52 жылдан астам ғұмыр кешіп, 7 баланы өмірге әкеліп, тәрбиелеп өсірген Дүйсенғали мен Бағила Қонақтовтармен сұхбат құрып, үйлесімді отбасы болудың құпиясын біліп, тату-тәтті шаңырақ иелерінің әдемі көрінісіне куә болды. Әңгіме барысында отағасы Дүйсенғали Қонақтов бүгінгідей бірлігі мен сыйластығы жарасқан бақытты жанұя болу жолындағы қиындықтары мен қызықтарын айтып, естеліктерімен бөлісті.
Ал Мұғалжар аудандық орталық кітапхана ұжымы Қандыағаш қаласының тұр-ғындары, 50 жыл отасқан Сырлыбай аға мен Аққойсын апаның шаңырағына барып, дастарқанынан дәм татып, отбасының тыныс-тіршілігімен танысты.
САЛТ-ДӘСТҮР КҮНІ: ТӘРТІП САҚШЫЛАРЫ ТҰСАУКЕСЕР РӘСІМІН ӨТКІЗДІ
17 наурыз – Мәдениет және ұлттық салт-дәстүрі күнінде орай Қандыағаш станциясы желілік полиция бөлімі ұжымында тұсаукесер рәсімі өтті.
Аталмыш бөлімнің тергеу бөлімшесінің тергеушісі, полиция аға лейтенанты Сәбит Әжіғұловтың ұлы Сәтжанның тұсауын Қандыағаш станциясы желілік полиция бөлімі бастығының орынбасары, полиция майоры Ербол Қалиев кесіп, алғашқы қадамына сәттілік тілеп, «Баланың әр жетістігін көру — зор қуаныш. Тұсаукесер де осындай ұлтымыздың ұлағатты салтының бірі. Сәбилеріміз сүрінбесін, әрқашан жолдары болсын! Барлық сәби бақытты болсын!» — деп жылы лебізін білдірді.
Дәстүрлі орындау барысында тұсаукесер салтының барлық кәделері жасалды.
БІЛІМ ОШАҒЫНДАҒЫ НАУРЫЗ ТОЙ
Бүгінде еліміздің түкпіртүкпірінде Наурыз мейрамы тойлануда. Жақсылықтың жаршысы болған Наурыз мейрамы Қандыағаш қалалық №4 орта мектебінде де кең көлемде аталып өтті.
Мектеп ауласына тігілген алты қанатты ақшаңқан киіз үй мен салтанаты жарасқан сахна маңына жиналған қауымның қарасы көп болды. Мәдени шараның шымылдығы Абыз ана мен ақ жаулықты әжелердің ақжарма тілектерімен ашылды. Көктемнің келгені мен мерекенің басталғанын сүйіншілеген жаршылар, шашу шашқан аналар мерекенің сәнін кетірді. Ал Қыдыр ата мен балалардың театрландырылған қойылымы көптің көңілінен шықты.
Ұлттық құндылықтар насихатталған шараға аудандық білім бөлімінің басшысы Бахраман Аманжол қатысып, Наурыз мерекесі еңбек пен іскерліктің, ыждағаттылық пен ынтымақтың, бауырмалдық пен достықтың алтын арқауы екенін атап өтіп, мектептің дамуына үлес қосып жүрген Раушан Булековаға, Сайлаугүл Бекеноваға, Балдырған Байзақоваға және Камшат Жамантаеваға өз атынан Алғыс хатын табыстады.
Наурыз тойына келген қонақтар киіз үй ішіне жайылған дастарқаннан ауыз тиіп, Наурыз көжеден дәм татты. Шара соңы «арқан тарту», «асық ату», «қазақ күресі», «гір көтеру» секілді ұлттық ойындарға ұласты.
А.МАНАСБАЕВА