Мұғалжар аудандық жастар ресурстық орталығының маманы Жұлдыз Елубай «Даналық» қоғамдық қорының ұйымдастыруымен өткен «BIRGEMIZ: ASYL МURA» жалпыұлттық жобасына қатысып, 300 мың теңгелік шағын грантқа ие болды.
Волонтерлік бастамаларды жүзеге асыруға бағытталған бұл шара аясында тарихи-мәдени мұраны сақтау, қорғау және тазалық жұмыстарын жүргізеді. Грант иегері Жұлдыз Ерланқызы волонтерлердің көмегімен Ақкемер ауылдық округі аумағында орналасқан Көтібар батыр кесенесінің маңына тазалық жұмыстарын жүргізеді.
— Бұл жоба жыл сайын мемлекеттік емес ұйымдар арасында ұйымдастырылады және 14-35 жас аралығындағы жастар қатыса алады. Биыл менің жобам мақұлданып, жеңімпаз атандым. Алдағы уақытта кесененің жан-жағын тазалап, қоқыстарын шығарып, шөптерін жұлып, сырлау жұмыстарын жасайтын боламыз. Тазалық жұмыстарына жалпы саны 10 волонтер жұмылдырылады, — деді грант иегері.