Аудандық мәдениет, тілдерді дамыту, дене шынықтыру және спорт бөлімі мамандарының ұйымдастыруымен тіл саясатын іске асыру жөніндегі аудандық кеңесші тобының мүшелері қала аумағындағы тамақтану орындарын аралап, тұтынушыларға ұсынылатын ас мәзірінің қай тілде жазылғанын тексеріп, түсіндірме жұмыстарын жүргізді. Мұндағы мақсат – мемлекеттік тіл-қазақ тілінің қолданысын кеңейту.
Жұмыс тобы алдымен «Тұмар» мен «Айым» мейрамханаларына және «Айша», «Алтын орман», «Ақтілек», «Янтарь» секілді өзге де тамақтану орындарына барып, ас мәзірлерін көрді. Өкінішке орай, жұмыс тобы барған орындарда мемлекеттік тілде жазылған ас мәзірін таппады.
Барлығы дерлік орыс тілінде жазылған болып шықты.
Жұмыс тобы бұл олқылықтарды түзеуге 21 күн көлемінде уақыт беріп, егер орындамаған жағдайда айыппұл салынатынын ескертті.
-Өткен аптада облыс әкімінің орынбасары Жолдас Батырханның төралығымен жиын өткен болатын. Аталған жиында қоғамдық тамақтану орындары мен сауда нүктелеріндегі ас мәзірлерінің мемлекеттік тілде берілуін қамтамасыз ету, жарнама және көрнекі ақпараттардың заң талаптарына сай рәсімделіп, әлеуметтік тақырыптағы ақпараттық баннерлерді орналастыру мәселелері қаралды. Осыған сай облыс аумағында тіл туралы заңның орындалуын қадағалау үшін түсіндірме жұмыстарын жүргізіп отырмыз, — деді аудандық мәдениет,тілдерді дамыту, дене шынықтыру және спорт бөлімі жетекші маманы Мейрамгүл Жұманбетова.