Облыстық жолаушылар көлігі және автомобиль жолдары басқармасы 2025 жылдың алғашқы жарты жылында атқарған жұмыстарын қорытындылады. Басқарма басшысының орынбасары Есет Аманбаев өңірлік коммуникациялар қызметі алаңында өткен баспасөз конференциясында өңірдің жол инфрақұрылымын дамыту жөнінде баяндады.
Басқарма өкілінің айтуынша биыл облыстың автожол саласын дамытуға 59,9 млрд теңге бөлінді. Аталмыш қаражатқа 156 жобаны іске асыру жоспарланған, яғни 464,1 км жол жөндеуден өтіп, жаңадан салынады.
«2025 жылы облыс аумағында автожолдарды салу және жөндеу бойынша 156 жобаны іске асыру көзделген. Оның 36-сы жергілікті маңызы бар жолдар, 120 жоба қалаішілік және елдімекен ішіндегі жолдар. Аталған жобалар толықтай іске асырылғаннан кейін жергілікті маңызы бар жолдардың жақсы және қанағаттанарлық деңгейдегі үлесі 82%-ге жетеді деп жоспарлануда» — деді Есет Аманбаев.
Айта кетейік, аймақтың көлік инфрақұрылымын дамыту мақсатында соңғы 3 жылда жергілікті маңызы бар жолдар мен көше-жол желісінің 1,2 мың шақырымнан астамы жөнделді. Бүгінгі таңда облыстағы жергілікті маңызы бар автомобиль жолдарының жалпы ұзындығы 4412 км құрайды.