Жем қалалық кітапханасының «Coworking» орталығында Қазақстанның Халық әртісі, әйгілі сазгер, қазақ вальсінің королі атанған Шәмші Қалдаяқовтың 95 жылдығына арналған «Қазақ вальсінің королі» атты әдеби-сазды кеш өтті.
-Кештің мақсаты – қазақ музыка өнерінің қазынасына үш жүзге жуық ән қосқан ұлы композитордың шығармашылығын дәріптеу, әр жүрекке ұялаған мәңгілік әуендермен жастарды жақынырақ таныстыру болды, -дейді Жем қалалық кітапханасының кітапханашысы Наталия Лемежис.
Шараға Жем қаласының №5 жалпы білім беретін мектеп оқушылары қатысты. Әдеби-сазды кеш Қазақстан Республикасының Мемлекеттік Әнұраны саналатын Шәмші Қалдаяқовтың «Менің Қазақстаным» әнімен басталды. Одан кейін кітапханашы Н. Лемежис сазгердің өмірі мен шығармашылық жолына кеңінен тоқталды.
Экран арқылы тыңдармандарға «Ақ бантик», «Арыс жағасында», «Сыр сұлуы», «Қайықта», «Бақыт құшағында» сияқты халық арасында кеңінен таралған әндер ұсынылып, оқушылар ерекше әсер алды.Кеш соңында «Шәмші Қалдаяқовтың әндері» атты кітап көрмесіне шолу жасалды.
«ҚАЗАҚ ВАЛЬСІНІҢ КОРОЛІ» АТТЫ ӘДЕБИ-САЗДЫ КЕШ ӨТТІ
