Қандыағаш қаласындағы №4 жалпы білім беретін орта мектепте мектеп түлектерімен тағылымды кездесу өтті. Кездесу әскери мамандыққа қызығушылық танытқан оқушыларға кәсіби бағдар беру мақсатында ұйымдастырылды.
Іс-шараға Шоқан Уәлиханов атындағы әскери колледжде білім алып жүрген мектеп түлектері қатысып, өздерінің оқу барысы мен әскери өмірдің ерекшеліктері туралы әңгімелеп берді. Атап айтқанда, кездесуге Әділет Мәдиұлы, Дәулет Алдияр, ағайынды Ислам және Исмаил Аманғали қатысты.
Кездесу барысында әскери оқу орнына түсу талаптары, оқу мен тәртіп, күнделікті дайындық жайлы кеңінен айтылды. Сонымен қатар әскери колледждің тыныс-тіршілігін таныстыратын бейнероликтер көрсетілді. Оқушылар тарапынан қойылған сұрақтарға түлектер нақты жауаптар берді.
1 курс студенті Әділет Мадиұлының айтуынша, әскери оқу орны болашақ офицерлерді жан-жақты даярлауға бағытталған. Ал 2 курс студенті Ислам Аманғали әскери өмірдің жауапкершілік пен тәртіпке негізделетінін атап өтіп, бұл жолды таңдауда табандылықтың маңызды екенін жеткізді.
Шараға алғашқы әскери дайындық пәнінің мұғалімдері мен 9-сыныптың ер бала оқушылары қатысып, әскери мамандыққа қатысты пайдалы мәліметтер алды.
ӘСКЕРИ МАМАНДЫҚ-АБЫРОЙЛЫ МІНДЕТ
