Облыс әкімі Оңдасын Оразалин Қандыағаш қаласында орналасқан «Неохим» компаниясына қарайтын газоблок шығаратын зауытқа барды.
Жаңадан ашылған зауыт жоғары сапалы газоблок өнімдерін шығарады. Кәсіпорынның филиалдары Нұр-Сұлтан, Ақтөбе және Алға қалаларында жұмыс істейді.
«Неохим» компаниясының бас директоры Александр Вавилов баяндағандай Қандыағаш қаласынан ашылған зауытта шығарылатын газоблоктары экологиялық таза материал. Олардың құрамында химиялық зиянды заттар жоқ, құрылыстың пайдалану мерзімін ұзарту үшін қандай да улы құраммен өңдеуді қажет етпейді. Экоблоктар экологтардың құрылыс материалдарына белгіленген барлық талаптарына сай келеді.
Бүгінде Қандыағаш қаласындағы газоблок шығаратын зауытының өнімдері тұтынушылардың сұранысына ие болып отыр.
Жаңадан ашылған зауытта аудандық жұмыспен қамту орталығы арқылы 30 мұғалжарлық азаматтар еңбек етуде.
Бұл жобаны отандық инвестор жүзеге асыруда және Ақтөбе облысының индустрияландыру картасына енген кәсіпорын.
Кәсіпорынның жұмысымен танысқан облыс басшысы олардың жұмыстарына сәттілік тіледі.