Ақтөбе қаласында «Қазақстан Барысы -2023» республикалық турнирінің Ақтөбе облысы бойынша іріктеу кезеңі өтті.
Осы додаға қатысқан жерлесіміз, Қандыағаш қаласының мамандандырылған балалар-жасөспірімдер спорт мектебінің түлегі Еламан Қойшыбаев жеңімпаз атанды.
Қарсыластарының алдын орап жеңіс тұғырынан көрінген Еламан ақтық белдесуде Әйтеке би ауданының намысын қорғаған Ерасыл Амангелдіні айқын басымдылықпен жеңіп, «Ақтөбе Барысы» атағына ие болды.
Облыстық іріктеу кезеңінде жеңімпаз бен жүлдегер атанған палуандар ұйымдастырушылар тарапынан ақшалай сыйлықтармен марапатталды.
Еламан Қойшыбаев енді Астана қаласында өтетін «Қазақстан Барысы — 2023» республикалық турнирінде Ақтөбе облысының намысын қорғайтын болады.