БУРАБАЙ. KAZINFORM – Мемлекет басшысы Қасым-Жомарт Тоқаев Бурабайда өтіп жатқан Ұлттық құрылтайдың IV отырысында «Таза Қазақстан» бастамасы туралы айтты.
− Тазалық мәселесі әрдайым назарда болуға тиіс. Былтырдан бері елімізде «Таза Қазақстан» акциясы жүріп жатыр. Бастамаға азаматтар жаппай қолдау білдірді. Акция жалпыұлттық сипатқа ие болды. Күн жылынып келеді, енді жұрт сенбілікке шығып, айналасын тазалайды. Бұл – өте дұрыс. Мен бұған дейін де айттым, «Таза Қазақстан» – жай науқан емес. Бұл әр адамның және барша халықтың күнделікті дағдысы, өмір салты болуы қажет, − деді Қасым-Жомарт Тоқаев.
Айта кетейік, Президент бастамасымен қолға алынған «Таза Қазақстан» экологиялық науқанына былтыр 2,4 миллион адам қатысып, 2,5 миллион көшет отырғызылды.
Премьер-министр Олжас Бектенов Үкімет отырысында «Таза Қазақстан» экологиялық бастамасы тиімділігін көрсеткенін айтты.
Сондай-ақ, елімізде 2024-2029 жылдарға арналған «Таза Қазақстан» экологиялық мәдениетін дамыту тұжырымдамасы бекітіледі.