Ақтөбе облысы полиция департаментінің бастығы Абай Жүсіпов Мұғалжар ауданының тұрғындарымен кездесті. Аудандық мәдениет үйінде өткен кездесуге аудан әкімі Дархан Ермағанбетов және аудан тұрғындары қатысты.
Халықпен есептік кездесуде Ақтөбе облысы полиция департаментінің бастығы Абай Қуатбайұлы Мемлекет басшысының Қазақстан халқына Жолдауының, сондай-ақ 2025 жыл — профилактика жылы деп жариялануына байланысты, ведомство басшысының заң мен тәртіп күзетіндегі полицияның алдына қойған міндеттердің іске асырылуы туралы айтты. 2024 жылы атқарылған жұмыстарды қорытындылады.
Ашық, еркін форматта өткен жиында полиция департаментінің бастығы қоғамдағы өзекті мәселелерге, оның ішінде: тұрмыстық зорлық-зомбылық, балалар қылмысы, нашақорлық, интернет-алаяқтық, жол қозғалысы қауіпсіздігі, мал ұрлығы мәселелеріне тоқталып, сақтық шаралары туралы түсіндірме жұмыстарын жүргізді. Кездесуге қатысқан тұрғындардың ұсыныс-пікірлерін тыңдап толғандырған сауалдарына жауап берді.
Кездесуде сөз алған аудан әкімі Дархан Жанысханұлы атқарушы органдар тарапынан аудандағы қылмыстың алдын алу бойынша іс-шаралар барынша жүйелі жүргізілетінін және полицияға жан-жақты көмек көрсетілетінін айтты.
Кездесу соңында Ақтөбе облысы полиция департаментінің бастығы Абай Жүсіпов қатысушылардың барлығына белсенді азаматтық ұстанымдары үшін алғыс айтып, полиция мен азаматтар арасындағы ынтымақтастық пен сенімді қарым-қатынас орнату — қылмыспен күреске және қоғамдық тәртіпті сақтауды қамтамасыз етуге қатысты проблемалық мәселелерді түсінуге және шешуге оң ықпал ететінін атап өтті.
Есепті кездесуден кейін полиция департаментінің бастығы азаматтарды жеке қабылдады.