Осы жылы «Дипломмен ауылға» бағдарламасы арқылы 23 маман жұмысқа орналасқан. Бұл туралы аудандық экономика және бюджеттік жоспарлау бөлімінің мамандары хабарлады.
Ауылда жұмыс жасауға ниет білдірген мамандарға 2025 жылға жергілікті бюджеттен көлемі 14071,0 мың теңге бөлініп, 23 маманның өтініші негізінде көтерме жәрдемақы аударылған.
Аудандық экономика және бюджеттік жоспарлау бөлімінің басшысы Ғайният Асқаров аталған бағдарлама арқылы ауданның білім саласына 19 маман, денсаулық сақтау саласына 2 маман, мемлекеттік қызметке 1 маман, ветеринария саласына 1 маман жолданғанын жеткізді.
— Ауылға барып жұмыс жасап жатқан мамандарға тұрғын үй сатып алуға екі мың айлық есептік көрсеткішке тең, яғни 7 864 000 теңге және жүз айлық есептік көрсеткіш көлемінде бір жолғы көтерме жәрдемақы беріледі. Оның жалпы көлемі — 393 200 теңге. 2025 жылы қаржылық жоспарға сәйкес тұрғын үй сатып алуға бюджеттік несие барлығы республикалық бюджеттен 23592,0 мың теңге бөлінді. Жоспарланған қаржының кеш түсуіне байланысты қаржыны алдағы айларда игеруді жоспарлап отырмыз, — деді Ғайният Асқаров.
Н.ТІЛЕП