Бүгінгі жаһандану дәуірінде елдің даму деңгейі тек экономикалық көрсеткіштермен емес, қоғамдағы татулық пен келісім деңгейімен де өлшенеді. Қазақстан – түрлі этнос пен дінді бір шаңырақ астында тоғыстырған мемлекет. Ел аумағында 130-дан астам ұлт пен ұлыс, 18 конфессия өкілдері өмір сүреді.
Бейбітшілік пен келісім – бұл тек бейбіт өмір сүру ғана емес, бір-бірінің мәдениетін құрметтеу, тілін үйренуге, дәстүрін түсінуге ұмтылу. Мұндай құндылықтар қоғамдағы сенім мен өзара қолдауды арттырады.
Қазақстанда бұл бағытта нақты институттар жұмыс істейді: Қазақстан халқы Ассамблеясы, этномәдени орталықтар, достық үйлері. Олар мәдени көпір рөлін атқарып, әртүрлі ұлт өкілдерін біріктіреді.
Тарих көрсеткендей, бөлінушілік пен араздық елді әлсіретеді, ал татулық пен келісім – оны күшейтеді. Сондықтан әр азаматтың міндеті – қоғамдағы бейбітшілікті сақтау мен нығайтуға үлес қосу.
Тәуелсіз Қазақстанның басты жетістіктерінің бірі – тұрақтылық. Оны сақтау – баршамыздың ортақ парызымыз.
Шукурова Еркежан, «Ақтөбе облысы әйелдерінің аграрлық одағы» қоғамдық бірлестігінің төрағасы