Ағымдағы жылы 23 қыркүйекте Ақтөбе қаласында Қазақстан халқы Ассамблеясының этномәдени бірлестіктеріне арналған республикалық семинар-тренинг өз жұмысын бастады. Екі күнге жоспарланған шараға еліміздің түкпір-түкпірінен этномәдени бірлестік өкілдері жиналды.
Семинар ҚР Мәдениет және ақпарат министрлігінің, Ақтөбе облысы әкімдігінің қолдауымен және ҚР МАМ Этносаралық қатынастарды дамыту комитетінің “Қоғамдық келісім” РММ ұйымдастыруымен өткізіліп отыр.
Жиынның басты мақсаты – этномәдени бірлестіктердің қоғам өмірінің түрлі салаларында тиімді әріптестік орнату тәжірибесін арттыру, этносаралық коммуникацияларды жетілдіру және бірлікті нығайтуға бағытталған жобаларды дамыту.
Бағдарлама барысында қатысушылар мемлекеттік саясаттағы жаңа тәсілдер, заманауи коммуникация және интеграциялық үрдістер бойынша тәжірибелі мамандардың дәрістерін тыңдап, тәжірибе алмасады.
Бұл семинар-тренинг Қазақстан халқы Ассамблеясының 30 жылдық мерейтойы аясында ұйымдастырылып, өңірлердегі этномәдени бірлестіктердің кәсіби әлеуетін арттыруға серпін бермек.