2019 жылы қолданыстағы шағын және орта бизнес субъектілерінің саны 8,6%-ға артып, 59,1 мың бірлікті құрады. Бұл туралы облыс әкімі Оңдасын Оразалин халықпен есептік кездесуінде мәлімдеді.
Өңір басшысының айтуынша облыста бизнесті дамытудың тиімді шаралары қабылданып жатыр. Кәсіпкерлердің белсенділіктерінің артуы арқасында шағын және орта бизнес саласымен айналысушылар саны 9,9%-ға немесе 147,1 мың адамға дейін артты. 2019 жылдың тоғыз айы ішінде 680,6 млрд теңгенің өнімі шығарылды
«Президент Қасым-Жомарт Тоқаев Қазақстан халқына жолдауында бизнесті қолдаудың әлеуметтік аспектілеріне назар аудара отырып, жаңа нысандарды белсенді түрде енгізуді тапсырды. Бизнестің қарқынды дамуына мемлекет тарапынан көрсетілетін қаржылық қолдаудың ықпалы зор. Осы ретте,«Бизнестің жол картасы-2025» бағдарламасы аясында 2,4 млрд теңге бөлінді. 430 шағын және орта бизнес субъектісі мемлекеттік қолдауға ие болып,10 жыл ішінде алғаш рет рекордтық көрсеткіштерге қол жетті. Негізінен қолдау өңдеу өнеркәсібіне, көтерме және бөлшек сауда, көлік және логистика, ауыл шаруашылығы, құрылыс, денсаулық сақтау, туризм және білім беру саласында іске асырылатын жобаларға көрсетілді. Жалпы, субсидияланған жобалар саны мен кредиттерге кепілдік беру бойынша өңір алдыңғы қатарда келеді», — деді өңір басшысы.
2019 жылы «Еңбек» жаппай кәсіпкерлікті дамыту және нәтижелі жұмыспен қамту бағдарламасының екінші бағытын жүзеге асыру үшін 6,2 млрд теңге бөлінді, құны 6,1 млрд теңге болатын 1133 жоба қолдау тапса, оның ішінде құны 5 млрд. теңге көлемінде болатын 90%-дан астам жоба ауылдарда жүзеге асырылды.
«Қарапайым заттар экономикасы» бағдарламасы аясында мақұлданған жобалар саны жағынан облыс республика бойынша көшбасшылардың бестігіне кіреді. Жалпы, 8,8 млрд теңгеге 85 жоба мақұлданды.
Облыста бизнес негіздерін оқытуға ерекше көңіл бөлініп келеді. Өткен жылы 6 мыңнан астам адам оқытумен қамтылып, оның ішінде 769-ы несие алды, 457-і жаңа бизнес идеялары үшін грантқа ие болды.
Әкімшілік кедергілерді жою және іскерлік ахуалды жақсарту жұмыстары жалғасуда.
Ақтөбе облысы «Doing Business» рейтингі аясында Дүниежүзілік банктің сарапшылары жүргізген «Қазақстанда бизнесті жүргізу – 2019» рейтингі аясында республика бойынша 3 орынға ие болды.
2020 жылы жұмыс жасап тұрған шағын және орта бизнес субъектілерінің санын 60 мың бірлікке дейін, жалпы өңірлік өнімдегі шағын және орта бизнес үлесін 20,7%-ға дейін жеткізу, жұмыспен қамтылғандар санын 147,5 мың адамға дейін арттыру жоспарлануда.