4 маусым — мемлекеттік рәміздер күні. 1992 жылы тап осы күні Тәуелсіз Қазақстанның жаңа мемлекеттік рәміздері алғаш рет бекітілді. Бүгін осы айтулы күнге орай Тәуелсіздік даңғылы бойында орналасқан саябақта «Ерліктің нышаны — елдіктің белгісі» атты салтанатты мерекелік іс-шара өтті.
Мерекеге орай жиналған Қандыағаш қаласындағы мекеме, кәсіпорын қызметкерлері, жастар мен қала тұрғындары Мемлекеттік Гимнді бір мезгілде орындау республикалық акция аясында сағат 10:00-де Қазақстан Республикасының Гимнін орындады.
Мерекелік іс-шарада сөз алған аудан әкімінің орынбасары Рустам Ахметов аудан тұрғындары мен қонақтарын Рәміздер күнімен құттықтады. Мерекелік іс-шара аудандық мәдениет үйінің қызметкерлері дайындаған патриоттық концерттік бағдарламамен жалғасты.
Сондай-ақ мерекеге орай «Достық» мөлтек ауданы көпқабатты №14 үйдің балкондарына мемлекеттік Тулар ілінді.