«ҚР Еңбек нарығын дамытудың 2024 – 2029 жылдарға арналған тұжырымдамасы» шеңберінде жұмыссыз азаматтарды қысқа мерзімді кәсіптік оқумен қамту жалғасуда. Бұл туралы аудандық Мансап орталығының мамандары айтты.
Кәсіптік оқыту мерзімі – 3 ай. Ай сайын 32681 теңге көлемінде шәкіртақы қарастырылған. Оқуды аяқтағаннан кейін кем дегенде 12 ай мерзімге тұрақты жұмысқа орналасуға мүмкіндіктер қарастырылған. Орталық мамандары осы жылы аудан бойынша 100 адамды кәсіптік оқумен қамту жоспарда барын жеткізді. Бүгінге дейін 16 адам кәсіптік оқуға тартылған.
— Қысқа мерзімді кәсіптік оқу – жұмысшы кадрларды кәсіптік даярлау және қайта даярлау бойынша оқу мерзімі қысқартылған білім беру бағдарламаларын іске асыруды көздейтін техникалық және кәсіптік білім беру жүйесінің бөлігі. Қысқа мерзімді кәсіптік оқудан өтетін бағдарлама қатысушылары
— 35 жасқа дейінгі жастағы жастар мен халықты жұмыспен қамту орталықтарында тіркелуіне қарамастан жұмыссыздар. Бүгінде қысқа мерзімді кәсіптік оқуға қатысушылар азпаздық, электрогаз дәнекерлеуші, слесарь-сантехник, цифрлы ақпаратты өңдеу маманы, материалдарды бақылау және өлшеу слесары мамандықтарын қайта меңгереді, — деді Мансап орталығы директорының орынбасары Венера Урумбаева.
БИЫЛ 100 АДАМ ҚЫСҚА МЕРЗІМДІ КӘСІПТІК ОҚУҒА ЖОЛДАНАДЫ
