25 қазан — Республика күні мерекесі қарсаңында Мұғалжар ауданының Ақкемер ауылдық округіне қарасты Жарық ауылына көгілдір отын берілді.
Салтанатты іс-шараға Мұғалжар ауданының әкімі Дархан Ермағанбетов, Ақтөбе облыстық энергетика және тұрғын-үй коммуналдық шаруашылығы басқармасының басшысы Арысұлан Айтбаев қатысып, ауыл тұрғындарын қуаныштарымен құттықтады.
Аудан басшысы Жарық ауылына газ тарту жұмыстары Ақтөбе облысының әкімі А.Шахаровтың елді мекендерді газдандыруға арналған жоспарына сәйкес жүзеге асырылғандығын жеткізді.
Аудан басшысы мен облыстық энергетика және тұрғын-үй коммуналдық шаруашылығы басқармасының басшысы көгілдір отын келген ауыл тұрғыны Асановтар отбасының шаңырағында болып, қуаныштарына ортақтасты.
556 тұрғыны, 100 үйі бар Жарық ауылының тұрғындары көгілдір отынның келуіне атсалысқан азаматтарға алғыстарын жеткізді. Жарық ауылына газ тарту жұмыстарын «А.Т.Е. – Жол » ЖШС-і жүргізді.