Хромтау ауданында Мемлекет басшысы Қасым-Жомарт Тоқаевтың тапсырмасына сәйкес баламалы энергетиканы дамытуға бағытталған маңызды жоба іске асырылуда, деп хабарлайды Ақтөбе облысы әкімдігінің баспасөз қызметі.
Жобаның құны 74,2 млрд теңге, белгіленген қуаты – 150 МВт. Құрылыстың толық аяқталуы биылға жоспарланған.
Қазіргі уақытта қуаты 12,5 МВт құрайтын екі жел генераторы пайдалануға берілді, олар – Қазақстандағы ең қуатты жел қондырғыларының қатарында. Өндірілген алғашқы электр энергиясы Дөң тау-кен байыту комбинатының 35 кВ электр желісіне берілді. ЖЭС толық қуатқа шыққаннан кейін көмірқышқыл газы (CO₂) шығарындыларының жылына 500 мың тоннадан астам төмендеуі күтілуде.
Сонымен қатар, Хромтау ауданында жалпы құны 115 млрд теңгені құрайтын жел электр станцияларын салу бойынша тағы екі жоба іске асырылуда.
Бұл жобаларды жүзеге асыру өңірдің энергетикалық тұрақтылығын қамтамасыз етудегі маңызды қадам, энергияның неғұрлым экологиялық көздеріне көшуге ықпал етеді. Жел энергиясын пайдалану көміртегі қышқылын азайтып қана қоймай, жаңа жұмыс орындарын ашады, сондай-ақ Қазақстанның «жасыл» энергетикасын дамытуға үлес қоса отырып, өңір экономикасын нығайтады.