Жалпы, еліміз тәуелсіздік алып, еңсесін көтергелі жастарды қолдауға басымдық беріп, сол мақсатта бірқатар ірі жобалар, көптеген шаралар жүзеге асырылып келеді. Бір сөзбен айтқанда, жастар – қоғамның қозғаушы күші. Көзі ашық, көкірегі ояу кез келген жас ұрпақ өз елінің даму жолында аянбай тер төгеді. Жастардың қоғамдық ой-санасын жетілдіру, шығармашылық әлеуетін арттыру жолында аудандық Жастар ресурстық орталығының алар орны ерекше. Осыдан 13 жыл бұрын жастардың ортақ мәселелерін жергілікті, республикалық дәрежеде қолға алу үшін Жастар ресурстық орталықтары құрыла бастады. Сол орталық біздің ауданда да ашылып, жұмысын бүгінгі күнге дейін жалғастырып келеді. Газет журналистері орталық басшысы Дәулет СЕРІКБАЕВПЕН жүздесіп, атқарылған жұмыстар мен алдағы жоспарлары туралы сұхбат құрды.
АУДАНДА 16 МЫҢҒА ЖУЫҚ ЖАС ТҰРАДЫ
Аудандық статистика басқармасының мәліметіне сүйенсек, мұғалжарлықтар саны 67 741 болса, оның 15 720-сы, яғни 23,2% жастар. Тарқата айтсақ, аудан орталығында 9 458 жас болса, 3 559-ы ауылдық елді мекендерде тұрады. Оның ішінде 8 095-і жігіттер, 7 521-і қызкеліншектер. Бүгінде ауданда 14 пен 35 жас аралығындағы жастардың дерекқоры жинақталып, «Жастар» ақпараттық базасы жаңартылуда. Бұл туралы аудандық жастар ресурстық орталығының басшысы айтты. Басшылық қызметке келгеніне бір жыл тола қоймаған оның осы күнге дейін атқарған жұмысы да аз емес, ертеңге құрған жоспары да жетерлік.
— Жалпы орталық жастардың әлеуметтік, тұлғалық дамуына жәрдемдесетін және жастар ұйымдарының қызметіне қолдау көрсететін ұйым. Оның негізгі міндеттерін — жергілікті ұйымға қарасты жастарды жұмысқа тұруға дайындау, цифрлық сауаттылығын арттыру, жастар ортасында волонтерлік қызметті дамыту, жас отбасылармен жұмыс істеу, жастарға қатысты мәселелерді анықтау, мемлекеттік бағдарламаларды жастарға түсіндіру, жұмыс мәселесіне қатысты жәрмеңкелер туралы әлеуметтік желілерде ақпараттандыру, түрлі мәдени шаралар ұйымдастыру, әлеуметтік зерттеулер, талдамалық жұмыстар жүргізу сынды маңызды бағыттар кіреді, — дейді орталық басшысы Дәулет Алмасұлы.
ЖҰМЫСҚА ҚАМТЫЛДЫ:
Жалпы — 150 жас
«Жастар тәжірибесі» — 6 жас
Кәсіптік оқыту — 100 жас
Қоғамдық жұмыс — 34 жас
«Жасыл ел» бағдарламасы — 70 жас
ЖАСТАРДЫ ЖҰМЫСПЕН ҚАМТУ – МАҢЫЗДЫ
Өткен жылы жұмыспен қамту органдарының ықпал етуімен 150 жас жұмысқа орналастырылса, «Жастар тәжірибесі» бағдарламасына 248 жас қатысып, кәсіптік оқытуға жіберілген жастардың саны 100-ге жеткен.
— Біздің орталық «Мансап» орталығымен бірлесіп, бос жұмыс орындары жәрмеңкесі аясында 2024 жылы 8 бос орындар жәрмеңкесін өткізіп, оған жалпы саны 385 адам қатысты. Оның ішінде 16-35 жас аралығындағы жастар саны 80 адамды құрады. Оның ішінде «Жастар практикасына» — 6, қоғамдық жұмысқа 34 жас тартылса, ал әлеуметтік жұмыс орындарына 2 адам жолдама алды. Сонымен қатар 52 мүгедектігі бар жас мансап орталығына жүгініп, нәтижесінде 9 жас мемлекеттік грантқа, ал бір жас қысқа мерзімді оқу курсына қатысты, — дейді ол.
Жастарды жұмыспен қамтудың бір жолы – «Жасыл ел» бағдарламасы. Аудан бойынша аталған бағдарлама аясында өткен жылы 70 адам жұмыспен қамтылған. Жастар ресурстық орталығының басшысы Дәулет Серікбаев былтыр жасақшылар Ембі және ауылдық округтерде жұмыс жасағанын айтты.
-2024 жылы бағдарламаны жүзеге асыруға 5 млн 950 теңге қаражат бөлініп, әрбір қатысушының айлық көрсеткіші 85 000 теңге құрады. Өткен жылдың маусым айында «Атамекен» студенттік құрылыс және «Жасыл ел» жастар еңбек жасақтарына 21 адам қатысты. Яғни, Ембі қаласы орман шаруашылығында 5 адам, Мұғалжар ауылдық орман шаруашылығында 5 адам, Орқаш ауылдық округі орман шаруашылығында 11 адам болды. Жастарға орманда сенбілік жұмыстары апта сайын жүргізілді. Сонымен қатар шілде айы бойына 36 «Жасыл ел» жастар еңбек жасақтары жұмыстанды. Оның бесеуі Ембі қалалық орман шаруашылығында, тағы бесеуі Құмжарған ауылдық округінде, және бесеуі Батпақкөл ауылдық окуругінде, 21 адам Қ.Жұбанов атындағы ауылдық округтегі орман шаруашылығында жұмылдырылды, — деді ол.
Ал сол жылдың тамыз айында Қ.Жұбанов атындағы ауылдық округтегі орман шаруашылығында 13 адам жұмыс жасаған.
ҚАЙЫРЫМДЫЛЫҚ ЖАСАУ – ЖҮРЕКТЕН
Бүгінде аудан бойынша 10 волонтерлық топ бар. Ол топтардың әрқайсысы түрлі қайырымдылық шараларын өткізіп, игі істердің басында жүреді. Сол топтардың бірі — «Мұғалжар еріктілері» жастар ресурстық орталығының ұйымдастыруымен бірнеше шаралар өткізген.
—Сонымен қатар орталықтың ұйымдастыруымен волонтерлық қозғалысты дамыту бойынша «Жақсылыққа ұмтыл», «Жақсылық жасап жарысайық!», «Қоғамға пайдаңды тигіз» сынды жобалары тұрақты түрде жүзеге асырылып, мұғалжарлық еріктілер өткен жылы 70-ке жуық шара өткізіп, оған 300-ге жуық жас тартылды, — деді Дәулет Алмасұлы.
NEET САНАТЫНДАҒЫ ЖАСТАРҒА ҚАМҚОРЛЫҚ КЕРЕК
Мемлекет басшысы ҚасымЖомарт Тоқаев осыдан бірнеше жыл бұрын Парламент Мәжілісінің отырысында: «Жұмыссыздықты, әсіресе жастар арасындағы жұмыссыздықты азайтуға ерекше көңіл бөлу керек. Жоғары оқу орындарын, колледждерді бітірушілер, әсіресе, білімі жоқ жастардың тұрақты жұмысқа орналасу мүмкіндігі әрқашан бола бермейді. Біз мұны жақсы білеміз. Олар тапқан жұмысын істеп өмір сүреді. Кейбіреулер табыс іздеп, заң бұзуы мүмкін», — деген болатын.
NEET санатындағы жастардың арасында жұмыссыз жастар, ауыл жастары, мүгедектігі бар жастар, ең төменгі күнкөріс деңгейінен табысы төмен жастар, жұмыс тәжірибесі жоқ білімді жастар, кішкентай балалары бар жас әйелдер, бейәлеуметтік жастар қамтылған. Оның ішінде ең өзектісі абсолюттік NEET (құлықсыз жастар) болып тұр.
—Орталықтың ы қпалымен мемлекеттік бағдарламаларды жеке түсіндіру және тарту, кәсіптік дағдыларды дамыту бойынша түсіндірме жұмыстары жүргізілді, жүргізіле береді. Басты мақсат — осы санаттағы жастардың санын азайтып, ел қатарына қосып жіберу, — деді ЖРО басшысы.
Осы орайда орталықтың авторлық «New 3 day» жобасы жүзеге асырылған еді. Жоба ұзақтығы 3 күнге созылды. Бұл жобаның мақсаты — аудандағы жұмыссыздықтың санын азайту, кәсіпкерлікті дамыту, жастар арасында мамандық таңдауда қателеспеуге бағыт-бағдар беру. Бұл жобаға аудан аумағындағы 16- 35 жас аралығындағы NEET санатына жататын 60 жас қатысып, заманауи төрт түрлі мамандық бойынша курстан өтті. Олар – «мобилография», «мakeup-визажист», «онлайн сауда», және «қызметтік сайттар». Қатысушыларды осы аталған салалардың мамандары мен спикерлері оқытты. Мобилография курсы бойынша Ақтөбе қаласының жас мобилографы Еркеұлан Ерболатұлы, Makeup-визажист курсы бойынша Инара Кулманова, онлайн сауда курсы бойынша осы салада қызмет жасап жүрген Наталья Мукашева, ал қызметтік сайттар бойынша мансап орталығының маманы Ақмарал Тулешова ақпарат берді. Курс соңында оқуға қатысқан жастарға сертификаттар табысталады.
— Дәл осы жобамыз биыл 21- 23 қаңтар күндері Ембі қаласында өз жалғасын тауып, жоба аясында 28 жас қатысты. Олар да 4 курс бойынша дәріс алып, қолдарына сертификаттар табысталды. Бұл жоба әрі қарай да жалғасын таба береді, — деді ол.
ЖАСТАРҒА АРНАЛҒАН ШАРАЛАР ЖАЛҒАСЫН ТАБАДЫ
Орталықта күн тәртібінде тұрған өзекті мәселелерге орай түрлі шаралар өткізіліп, жобалар жасалатынын жеткізді орталық басшысы. Мәселен, қазіргі өзекті мәселелердің бірі «Алаяқтықпен күрес», «Лудомания» тақырыптарында колледж студенттерімен кездесу өткізіліп, бұл теріс жолдың зияны тәмпіштеп түсіндіріген. Сонымен қатар Мұғалжар аудандық мәдениет үйінде «Закладка» деп аталатын бейнеролик көрсетілді.
Жастар ресурстық орталығының мамандары пробация есебінде тұрған жастарға “Zhas Project” жобасы туралы түсіндірме жұмыстарын жүргізіп, жастар арасындағы құқықбұзушылықтың алдын алып, денсаулығын сақтау, спортпен шұғылдануына ынталандыру, дене тәрбиесі мен спорттың дамуына жағдай жасау мақсатында түрлі іс-шаралар ұйымдастырылыпты. Атап айтар болсақ, аудан орталығы Қандыағаш қаласында орталықтың ұйымдастыруымен аудандық және облыстық деңгейде «Өнер барысы-2024» турнирі және де «ШТАП JM» квест ойыны, «Үстел теннисі» ойыны, «Көңілді старт» спорттық сайысы және «Жас жауынгер-2024» әскери-патриоттық жарыстары өткізілді.
Сонымен қатар «Ақтөбе Жастары» тұрғын үй бағдарламасы бойынша ипотека рәсімдеп, ауданның екі жасы үйлі болыпты.
—Осы жылға да бірқатар шаралар, жобалар қолға алынып, жүзеге асырылады деген сенімдемін. Жастардың бос уақытын тиімді өткізу және мәдениетті қалыптастыру мақсатында спорттық, мәдени-көпшілік, т.б. іс-шаралар өткізілетін болады. Өткізілген шаралар туралы ақпарат әлеуметтік желіде міндетті түрде жариялайтын боламыз. Сондай-ақ 2025 жылдың қаңтар айында Мұғалжар аудандық №1,2 пробация мен жастар ресурстық орталығы арасында екі жақты меморандумға қол қойылып, іс-шара жоспары бекітілді, — деді сөз соныңда алдағы жоспарлармен бөліскен Дәулет Серікбаев.
Айгерім ДАРХАНҚЫЗЫ