-Менің есімім Әсемгүл. Бүгінде үлкен енемнің қолында тұратын немере келінімін. Осы шаңыраққа келінболыптүскенімеалтыжылдай уақыт болды. Бүгінде әжеме екі шөбере сыйлап отырған бақытты келіндердің бірімін десем болады. Алғаш келін болып түскен уақытымда білгенімнен білмегенім көп болды. Сондай сәттерде үлкен енем, бар білгенін үйретіп, өзінің өмірлік сабақтарымен бөлісіп, ақыл-кеңестерін аяған емес. Үлкен әжемнен үйренгенім өте көп. Соның ішінде, атап айтатыным — баланы бесікке салу дәстүрі.
Әжем алғаш ана болып, балапанымды қолыма алған сәтімде мені жанынаотырғызып, баланыбесікке бөлеу үлкен той, қуаныш екенін, бесікке бөлеу барысында орындалатын түрлі ырымдардың барын айтып түсіндірген еді. Баланы бесікке салатын күні көрші-көлемді жинап, тойжасап, бесікке салу дәстүрін жасады. Баланы күміс теңгелер салынған «шілде суға» түсірді. Бесіктің барлықжасауын дайындап, шүмегі мен түбегін ыңғайлап, бала шошымасын деп «біссмілләсін» айтып, жеті шырпымен аластап, басына шаппа, қамшы, тұмар қойды. Жастықтың астына «жүзі жарқын болсын» деген ниетпен айнамен тарақты да салғызды. Тұңғышымды бесікке салу сәтінде шүмек салуға арналған түбектің айналасын ақ шүберекпен жауып, «тыштырма» кәдесін көрсеткені есімде. Жиналғандар шуласып, бесік түбіне төгілген тәтті тағамдарды алып, риза болды. Осы сәт менің есімде жылы да, әдемі сәтімен сақталып қалды. Содан соң баланы бесікке бөлеп, өнегелі адамдардың жеті түрлі киімімен жауып, сол кісілер секілді үлкен азамат болып өсуіне тілектестігін білдіріп, батасын берді. Әжемнің бесік жырын айтып, шөбересін тербетіп отырған сәтіне қарап, жүрегімді үлкен қуаныш кернейді.
Әжем бесіктің пайдасы мен бесікке бөлеудің өзі үлкен өнер екенін айтудан жалыққан емес. Бесік баланың ұйқысын күзетіп қана қоймай, оны жын-шайтаннан да қорғайтынын үнемі есіме салып отырады. Шындығында бесік баланың тазалығына өте қолайлы, өйткені арнайы қойылатын түбек пен шүмек баланың дәретін жаймай, таза және ұзақ ұйықтауына жағдай жасайды.
Әжемнің айтқан әрбір ақылы маған алдағы уақытта үлкен сабақ болары сөзсіз. Солүшінде әжемді жақсы көріп, құрметтеймін. Әжемнен әліде үйренерім көп.
Нұрғаным КЕСІКҚҰЛ