Бүгін, 18 мамыр күні Мұғалжар ауданына қарасты Жем қаласы мен Қайыңды ауылдық округінде төрт жылдық өкілеттік мерзімі аяқталған әкімдер сайлауы өтіп жатыр.
Сайлау учаскелерінде сайлаушылардың белсенді қатысуы күтілуде. Әкімдікке барлығы 7 үміткер бақ сынауда.
Қайыңды ауылдық округі аумағында екі сайлау учаскесі жұмыс істеп тұр. Оның бірі №347 сайлау учаскесінде 376 сайлаушы тіркелген. Ал №348 сайлау учаскесі Алтынды ауылында орналасқан, мұнда 271 сайлаушы бар.
№347 сайлау учаскесінің төрағасы Әлібек Кәңілдиновтың айтуынша, учаске таңғы сағат 7-де ашылды. Сайлау орташа қарқынмен өтуде. Қазіргі таңда 59 адам дауыс беріп үлгерген. Алғашқылардың бірі болып өз таңдауын жасаған ауыл тұрғыны — Бағдат Шарафиев.
№348 сайлау учаскесінде қазіргі уақытқа дейін 56 адам дауыс берді.
Еске сала кетейік, Қайыңды ауылдық округі әкімі қызметіне үш үміткер түсті, олар — Азамат Жиенбай, Жандос Көлбаев және Назгүл Жұмаева.