Жақында Алматы қаласында өткен республикалық “Jaidarman Junior” ойынында Мұғалжар ауданынан қатысқан Ащысай ауылдық округінің «Ақсу» Жайдарман тобы үздік өнер көрсетіп, жүлделі III орынға ие болды.
Байқауға еліміздің түкпір-түкпірінен 60 команда қатысып, бірнеше кезеңнен іріктеу нәтижесінде 25 команда ғана қалған. Финалға 9 команда жолдама алып, олардың арасында ақсулық жас жайдарманшылар үшінші орынды қанжығасына байлады.
Бұл — ауылдан шыққан талантты жастардың республикалық деңгейде өздерін дәлелдей алғанының айқын көрінісі.
“Ақсу” тобы — Ақсу ауылдық мектебінің белсенді, дарынды оқушыларынан құралған. Қысқа уақыт ішінде-ақ олар өздерінің ерекше ойлау қабілетімен, сахна мәдениетімен және тапқырлығымен көрермен ықыласына бөленіп үлгерді.
Бұған дейін де команда аудандық және облыстық Жайдарман сайыстарында Бас жүлде иеленіп, жеңіс кубогын өз ауылына алып келген болатын.
Команданың авторы әрі жетекшісі Нұрзат Қайырмағамбет, белгілі “Эконом Класс” командасының капитаны.
АҚСУЛЫҚ КОМАНДА ҮЗДІК ҮШТІКТЕН КӨРІНДІ
