Футболдан Қазақстан чемпионатының 26-туры аясында ақтөбеліктер өз алаңында алматылық «Қайрат» клубын қабылдап, ірі жеңіске қол жеткізді.
Маусымның ақырғы матчына өңір басшысы Ералы Тоғжанов келіп, командаға қызу қолдау танытты.
Ойын ақтөбелік жанкүйер Азамат Бекетовты бір минут үнсіздікпен еске алумен басталды. Ал матчтың үзілісінде Қазақстан чемпионы атанған «Ақтөбе-2013» балалар командасы мен Оралда топ жарған “Академия жастары” алтын медальмен марапатталды.
Әсерлі ойынның нәтижесінде «Ақтөбе» «Қайратты» 4:1 есебімен тас-талқан ұтты. Клуб 7 жылда алғаш рет күміспен күптеліп, ел чемпионатының жүлдегерлері қатарынан көріне білді.
Облыс әкімі Ералы Лұқпанұлы матчтан соң ойыншыларды жетістігімен құттықтап, оларға жаңа белестер тіледі.
А.ІЛИЯС, «Ақтөбе» газеті.