Қандыағаш қалалық №3 мектеп-гимназиясында құқық бұзушылықтың алдын алу бойынша ер балалар жиналысы өтті.
Жиналысқа аудандық білім бөлімі басшысы Аманжол Бахраман, аудандық полиция бөлімінің бастығы полиция подполковнигі Бекжан Данияр қатысты.
9-11 класс оқушылары қатысқан кездесудің басты мақсаты – жасөспірімдердің құқықтық сауатын арттыру, олардың арасындағы құқық бұзушылықтардың алдын алу.
Кездесуде жасөспірімдер арасында қылмыс пен құқық бұзушылықтың алдын алу, кәмелетке толмағандардың бірін-бірі бопсалау, тонау, топтасып төбелесу деректерін болдырмау, білім мекемелеріне ұшты-кескіш заттарды алып келуге тыйым салу жолдары айтылды.
Оқушыларға олардың құқықтары, ата-аналарының құқықтары мен міндеттері, сонымен қатар, жасөспірімдердің әкімшілік және қылмыстық жауапкершіліктері түсіндірілді.
Бұл бағыттағы ақпараттық түсіндіру жұмыстары ауданның барлық білім ұйымдарында жалғасын табатын болады.