Ембі қалалық мәдени орталығының ұйымдастыруымен қазақ мәдениетінің кемеңгері, академик, әйгілі композитор, профессор, өнер ғылымының докторы, Қазақстанның халық әртісі, дирижер Ахмет Жұбановтың шығармашылығын насихаттау, ән өнерінің кеңдігін, тағлымы мол тарихын, қазақ халқының өшпес мұрасы екенін көрсете отырып, орта буын мен жас буынның өнер үндестігін көрсету мақсатында дәстүрлі аудандық “Жұбановтар әуендері-2024” ән байқауы өтті.
Аталған байқауға аудан бойынша Ембі, Жем қалалары мен Құмжарған, Қаракөл, Жағабұлақ, Құмсай ауылдарынан барлығы 6 үміткер қатысты. Байқау 2 кезеңнен тұрды. Бірінші кезеңде қатысушылар А.Жұбановтың, ал екінші кезеңде Ақтөбе қаласының 155 жылдығына орай патриоттық тақырыптағы әндерді шырқап, өзара тартысқа түсті.
Байқау қорытындысы бойынша қазылар алқасының шешімімен бас жүлдені Қаракөл ауылынан келген Мейрбек Тәжіғұлов қанжығалады. Жүлделі 1-орынды екі қатысушы, құмжарғандық Айгүл Имағамбетова мен Жем қаласынан келген Ерболат Құдайбергенов алса, ембілік Раушан Кәдірова 2-орынды иеленді. Ал 3-орынды Жағабұлақ ауылының қатысушысы Айнагүл Айтпағамбетова мен құмсайлық Алмагүл Ургешбаева бірге бөлісті.
Байқау соңында жергілікті айтыскер ақын Е.Сарманның сөзіне жазылған “Ембім менің” әнін М. Молдағазиев орындап, көрерменнің ыстық ықыласына бөленді.
«ЖҰБАНОВТАР ӘУЕНДЕРІ — 2024» ӘН БАЙҚАУЫ ӨТТІ
