Кеше Тараз өңірінде Жақсылық Үшкемпіров атындағы «Тараз-Арена» спорт сарайында қазақ күресінен «Кәсіподақ барысы – 2024» республикалық турнирі өтті.
Турнир ұлттық спорт түрлерін дамыту арқылы салауатты өмір салтын насихаттау, ұлттық құндылықтарды дәріптеу, салалық деңгейде қазақ күресінің дәрежесін көтеру, кәсіподақ ұйымдары арасында шынайы бәсекелестікті дамыту мақсатында ұйымдастырылды.
Республикалық турнир Қазақстандық оқу-ағарту, ғылым және жоғары білім қызметкерлері салалық кәсіподағының 100 жылдығына арналды. Додаға еліміздің барлық аймағынан 40-қа жуық балуан қатысты.
Боз кілемде 90 кг дейін және 90 кг жоғары салмақ дәрежесінде сынға түскен кәсіподақ мүшелері «Кәсіподақ барысы» атағын сарапқа салды. Байрақты бәсеке қорытындысында 90 кг жоғары салмақ дәрежесінде Қандыағаш қалалық мектептен тыс №1 Аула клубының қазақ күресі мұғалімі Жанкелді Айтжан жүлделі ІІ орынды еншілеп, диплом мен арнайы медальға және 350 мың теңгелік сертификатқа ие болды.
Ал, турнирге қатысқан №2 Қандыағаш орта мектебінің дене шынықтыру пәні мұғалімі Темірлан Бурунгалиев Салалық кәсіподақтың Алғыс хаты мен 50 мың теңгелік сертификат иеленді.
РЕСПУБЛИКАЛЫҚ ТУРНИРДІҢ КҮМІС ЖҮЛДЕГЕРІ АТАНДЫ
