Кеше аудандық жастар ресурстық орталығының ұйымдастыруымен «Біз көшбасшыларды іздейміз» атты жастармен кездесу өтті. Кездесуді аудандық ішкі саясат бөлімінің басшысы Ерік Бұхарбаев ашып берді.
Жастарды игі іске, бос уақыттарын тиімді пайдаланып, көшбасшылыққа жетелеуге шақыратын бұл кеште арнайы шақырылған спикерлер сөз сөйлеп, өздерінің еріктілікке қалай келгенін, бүгінгі таңда қандай игі істер атқарып жүргенін айтып, өскелең ұрпақты қайырымы мол, сауапты амалдарды бірге атқаруға шақырды.
Аудандық жастар ресурстық орталығының басшысы Дәулет Серікбаев кездесу кезінде сөз алып, бұндай бас қосулар жастардың өзара тәжірибе алмасып, жат қылықтан алыс болып, аудан жастарының болашаққа нақты мақсат қойып, жету жолында үлкен қадамдар жасауына үлкен мүмкіндік болатынын атап өтті.
Шара барысында қоғамға ақысыз еңбек еткен еріктілерге аудан әкімі Дархан Ермағамбетовтың атынан Алғыс хат табысталды. Жиын соңында «Ізгі қала» волонтерлық тобы қайырымды қала тұрғындары атынан ақтөбелік «Жүректен жүрекке» волонтерлық тобына 100 000 теңгелік сертификат табыстады. Аталған қаржы «Жүректен жүрекке» волонтерлық тобы қолға алған ақтөбелік жалғызбасты ананың баспаналы болуы үшін ашылған есепшотқа аударылады. Кеш соңы әуезді әнмен және жастардың ыстық ықыласымен аяқталды.
З.ЕСЕНЖОЛОВ