Қазақстан Республикасының жаңа Конституциясының жобасы қоғамның жаңару, әділеттілік пен тұрақты даму жөніндегі сұранысын айқын көрсетеді. Бұл – жай ғана түзетулер емес, құжаттың басым бөлігі қайта жазылып, адамға бағытталған мемлекет құрудың берік негізі қалануда.
Жобаның басты басымдығы – адамның қадір-қасиеті мен азаматтардың құқықтарын қорғау. Мемлекет азаматтардың бостандықтары мен құқықтарын, соның ішінде цифрлық кеңістіктегі құқықтарын қорғауды өз міндеті ретінде нақты бекітеді. Бұл – технологиялар қарқынды дамыған заманда аса маңызды қадам.
Құжатта Егемендік, Тәуелсіздік және аумақтық тұтастық мызғымас құндылықтар ретінде нақты айқындалған. Сонымен қатар бірлік, ынтымақ және этносаралық келісім қазақстандық мемлекеттіліктің берік іргетасы ретінде атап көрсетіледі.
Жобада әділеттілік, заң және тәртіп, сондай-ақ табиғатқа және болашақ ұрпақ алдындағы экологиялық жауапкершілік ерекше орын алады. Ел дамуының стратегиялық бағыты білім, ғылым және инновациялармен тығыз байланыстырылған.
Сондай-ақ мемлекеттік басқару жүйесін жаңарту көзделген: бір палаталы Парламент – Құрылтайды қалыптастыру, қоғам мен билік арасындағы диалогты күшейтетін вице-президент пен Халық Кеңесі институттарын енгізу ұсынылады.
Жаңа Конституция – ашық, қуатты және әділетті Қазақстанға жасалған сенімді қадам, онда мемлекет пен қоғам ортақ мақсатқа бірге ұмтылады.
Жұмагүл Асабаева, Мұғалжар аудандық аналар кеңесінің төрайымы.