«Мұғалжар» аудандық қоғамдық-саяси газеті

Конституция — мемлекеттің негізгі заңы

Ақтөбедегі Х. Доспанова атындағы № 14 орта мектепте «Жаңа конституция: жаңа көзқарас, жаңа жауапкершілік» тақырыбында интерактивті кездесу өтті.
«Заң және тәртіп» тұжырымдамасына орай «Жасөспірім және заң» мектепішілік профилактикалық онкүндігінің аясында ұйымдастырылған іс-шараға қалалық білім бөлімінің әдіскері Данияр Қуанышбаев, қалалық полиция басқармасы Алматы ауданының №2 ҚПБ анықтау бөлімшесінің бастығы, полиция капитаны Еркебұлан Кеңес, № 14 орта мектептің «Даналық мектебі» клубының мүшесі Мария Қарамбаева қатысты.
— Құқықтық білім, құқықтық мәдениет — әділ қоғамның кепілі. Құқықтық мәдениетті қалыптастыру балалық шақтан, яғни отбасы тәрбиесі мен мектеп қабырғасынан басталуы керек. Конституция — барлық заңдардың бастауы. Бүгінгі іс-шара, ең алдымен, Конституцияның басты құндылықтарын жас ұрпаққа түсіндіру, санасына сіңіру, сондай-ақ жасөспірімдер арасында құқық бұзушылықтың алдын алу мақсатында ұйымдастырылып отыр, — деді мектеп директорының тәрбие жұмысы жөніндегі орынбасары Ажар Омарова.
Алдымен полиция капитаны Еркебұлан Кеңес сөз алып, жаңа Конституцияда айқындалған азаматтардың құқықтары мен міндеттеріне тоқталды.
— Конституция — мемлекеттің ең жоғарғы заң күші бар негізі заңы. Конституцияда атап көрсетілгендей, заң алдында барша азамат тең. Құқықтық тұрғыдан қандай да бір сауалдар туындаған жағдайда, жасөспірімдер оның жауабын ата-ана, мұғалім сынды ең сенімді адамдар немесе сенімді ақпарат көздері арқылы ғана іздеуі керек, — деп атап көрсетті ол.
Кездесу барысында оқушылар құқық қорғау органдарының өкіліне, басқа да қонақтарға «Сен сұра — маман жауап береді» айдары арқылы өз сұрақтарын қойды. Сонымен қатар, заң үстемдігі, тәртіп, жауапкершілік ұғымдары төңірегінде пікір алмасып, өз ойларын жеткізді:
— Қоғам үшін, адам үшін ең маңызды ұғым — әділдік деп ойлаймын. Әділдік бар жерде әр адам өзін еркін сезіне алады. Ал әділдік тек заң үстемдігі мен тәртіп бар жерде ғана орнайды, — дейді 10-сынып оқушысы Бану Сағитжанова.
Іс-шарада әлеуметтік желідегі жауапкершілік, кибербуллинг, жеке адамның құқықтарын қорғау, әділдік, қоғамдық тәртіп және жасөспірімдер арасындағы даулардың алдын алу мәселелері де талқыланып, мамандар тарапынан нақты жағдайларға байланысты құқықтық түсіндірме берілді.

Индира ЖАЙМАҒАМБЕТОВА.

Ұқсас ақпараттар

Елімізде 4 мыңнан астам науқас ағза ауыстыруға мұқтаж

admin_mugalzhar

ТАЛДЫСАЙ ТҮЛЕКТЕРІНІҢ ТУҒАН ЖЕРГЕ ТАҒЗЫМЫ

admin_mugalzhar

ДДСҰ басшысы Тоқаевтың медицина қызметкерлерін қолдау саясатына ризашылығын білдірді

admin_mugalzhar