Ғасырға жуық уақыт жаңалықтың жаршысы бола білген бүгінгі «Мұғалжар» әр кезеңде атауын өзгертсе де, түрлі журналистердің қолтаңбасын сақтай отырып, өз мақсатын, оқырман алдындағы жауапкершілігін ұмытқан емес. Аудандық басылымның тұрақты оқырмандары да жылдар желісінде «Мұғалжарынан» алыстаған емес. Бүгінгі мерекелік нөмірге мұғалжарлықтар арасында сауалнама жүргізу барысында осыған тағы бір мәрте көз жеткіздік.
1.«Мұғалжар» газетін оқисыз ба? Әлеуметтік желідегі парақшаларын білесіз бе?
2.Газет бетінен қандай тақырыптағы мақалалар көргіңіз келеді?
3.Кешегі және бүгінгі газет қызметкерлері ішінен кімдерді атай аласыз?
Бибігүл ТӨЛЕГЕНОВА, Қандыағаш қаласының тұрғыны:
Интернетке кірмейтін кезімде газет-журналдарды сатып алып оқитынмын, қазір сол газет-журналдардың сайтына кіріп оқимын немесе әр түрлі сайттардан оқимын. Шыны керек, соңғы рет қашан қолыма газет ұстағаным есімде жоқ. Бірақ ауданнан шығатын «Мұғалжар» газеті бар екенін білемін. Журналистерден Әнуар Искаринді ғана біледі екенмін.