Жем қаласында ҚР Тәуелсіздігінің 30 жылдығына арналған аудандық іс-шаралар жоспарына сәйкес аудандық «Жем самалы — 2021» ән байқауы өтті. Осымен 18-ші рет ұйымдастырылған байқауға қалалық және ауылдық округтерден барлығы 15 өнерпаз қатысты. Ән байқауының ашылу салтанатына қатысқан аудандық ішкі саясат бөлімінің басшысы Ерік Бұхарбаев қатысушыларға сәттілік тіледі.
Шараның мақсаты — жас өнерпаздардың шығармашылық қабілеттерін дамыту, өнерге деген құштарлығын арттыру, жас дарындарды анықтау.
Екі айналымнан тұрған ән байқауында қатысушылар патриоттық және еркін тақырыпта 2 әннен орындады.
Ән байқауының қорытындысы бойынша әділқазылар алқасының шешімімен бас жүлдені қандыағаштық Мерей Самұрат иеленді. І орынға Мұғалжар ауылдық округінен қатысқан Нұржан Әбжан ие болды. ІІ орындарды Қуанышбек Қайратұлы (Жем қаласы) мен Қанат Арғынбаев (Талдысай а.о.) иеленді. ІІІ орындарға Құмжарған ауылдық округінен қатысқан Самғат Кеңесов пен ембілік Жолдас Самен ие болды.
Байқауға қатысып, өз өнерлерн ортаға салған жеңімпаздар мен жүлдегерлер және барлық қатысушылар да ынталандыру сыйлықтарымен және дипломдармен марапатталды.