Аудан әкімдігінде мемлекеттік қызмет саласының ардагері, саналы ғұмырын ауданның дамуы жолындағы еңбекке арнаған, Мұғалжар ауданының құрметті азаматы, жергілікті жазушы Амангелді Шунимовтың “Есімде әлі сол бір кез” кітабының тұсаукесері өтті.
Шараға аудан әкімінің орынбасары Бекболат Құлмағамбетов бастаған бөлім және мекеме басшылары мен қызметкерлері, аудан жастары қатысты.
Аталған кітапқа мұнарлы Мұғалжардың тасқа қашалған тарихы және ауданның қалыптасуы жолында еңбек етіп, әлеуметтік-экономикалық дамуына өз үлестерін қосқан азаматтар туралы әңгімелер, очерктер, повестер, новеллалар, мақалалар, естеліктер енген.
Сонымен бірге Амангелді Қалиұлының БАҚ құралдарына берген сұхбаттары да бар.
Автор кітабын балаларының анасы, асыл жары, ардагер-ұстаз Роза Оразғалиеваға арнаған.
Амангелді Шунимов 1941 жылы Жұрын ауылында дүниеге келген. Алғаш еңбек жолын мектеп мұғалімі болып бастаған ол жылдар желісінде аудандық комсомол комитетінің бірінші хатшысы, меңгерушісі, атқару комитетінің хатшысы, Октябрь ауданы әкімі аппаратының және аудандық ішкі саясат бөлімінің басшысы қызметтерін атқарған.
Оның бұған дейін “Қалмаққырған” атты көркем-әдеби кітабы жарық көрген.
Автор бүгінде құрметті зейнеткерлікке шықса да, аудан аумағында орын алып жатқан әлеуметтік-саяси оқиғалардан қалыс қалмай, Мемлекет басшысының Жолдаулары мен бастамаларын қолдап, қоғамдық шаралардан қалыс қалмай, жас ұрпақтың бойына тәрбие мен ұлттық құндылықты сіңіру жолында аянбай еңбек етіп келеді.
Шара барысында Амангелді Қалиұлының үзеңгіліс әріптестері, ізбасар шәкірттері сөз сөйлеп, тілі жатық, тарихы терең, мағынасы зор кітаптың болашақ жастарға берер пайдасы туралы айтты.
Сондай-ақ аудандық ішкі саясат бөлімінің басшысы Ерік Бұхарбаев аудан әкімі Дархан Ермағанбетовтың Алғыс хатын және естелік сыйлығын табыстады.