«БИЗНЕС БАСТАУ» ЖОБАСЫНА ОҚЫТУ БИЫЛ ДА ЖАЛҒАСАДЫ. АУДАНДЫҚ МАНСАП ОРТАЛЫҒЫНЫҢ МАМАНДАРЫ ОСЫ ЖЫЛЫ АТАЛҒАН ЖОБА АЯСЫНДА 624 МҰҒАЛЖАРЛЫҚТЫ КӘСІПКЕРЛІККЕ ҮЙРЕТІП, ӨЗ БИЗНЕСІН ЖҮРГІЗУГЕ МАШЫҚТАТУДЫ ЖОСПАРЛАП ОТЫР.
Мансап орталығының сектор меңгерушісі Венера Урумбаеваның айтуынша, оқуды сәтті аяқтаған жоба қатысушы аяқталғаны туралы сертификат алып, өзінің бизнес-жобасын іске асыру үшін 400 АЕК-ке дейінгі мөлшерде грант алуға және 2,5%-бен «Ауыл аманаты» жобасына үміткер бола алатынын жеткізді.
— «Бастау-Бизнес» жобасына қатысамын деушілерге бірнеше талап қойылады. Айталық, қатысушы жұмыссыз болып тіркелуі қажет. Сонымен бірге ісін жаңадан бастаған және жұмыс істеп жүрген кәсіпкерлер, табысы ең төменгі күнкөріс деңгейінен төмен жеке қосалқы шаруашылықта жұмыс істейтіндер, табысы ең төменгі күнкөріс деңгейінен төмен өндірістік кооператив мүшелері, бірыңғай жиынтық төлемді төлеушілер қатыса алады. Мәртебесін тексеру сәтінде ерікті түрде қоныс аударуға қатысушылардан басқа (оңтүстіктен солтүстікке қарай) жұмыспен қамтуға жәрдемдесудің белсенді шараларына қатысушы болып табылмағаны да ескеріледі, — деді Венера Урусбаева.
Н.ТІЛЕП