Таяуда Қазақстан Ұлттық жаратылыстану ғылымдары академиясының (ҚазҰЖҒА) академиктері жаңа Конституция жобасын талқылады.
ҚазҰЖҒА вице-президенті, академик Кәрімбек Құрманәлиев «Ғылым және инновация құндылықтары – басты бағдар» атты баяндама жасап, Ата заң жобасындағы заманауи ғылым мен сала дәстүріне басымдық беретін баптардың мән-маңызына тоқталды. Конституцияның қоғам талқылауына ұсынылған мәтінінде басты идея ретінде ғылым, білім, инновацияның алынуы отандық ғылымға серпін беретінін айрықша атап өтті. Сондай-ақ
ол адам капиталын дамыту, білімді өркендету, ғылым мен инновацияны ілгерілету еліміздің стратегиялық бағыты деп танылғаны еліміздің әлемге танылуына, жастардың осы салаға келіп, елеулі нәтиже көрсететініне ұжымның сенімді екенін жеткізді.
Ғылыми жиында Ұлттық жаратылыстану ғылымдары академиясының академиктері Владимир Школьник, Еренғайып Омаров, Тілеукен Ахметов, Ержан Көлдеев, Әбдікерім Зейнуллин сөз алып, Конституцияның жаңа жобасында алғаш рет Әділетті Қазақстанның заң мен тәртіп ұстанымы, мемлекетшілдік дәстүр, экологиялық жауапкершілік байыпталғаны, ғылым мен инновацияның басты құндылық ретінде айқындалғаны – еліміздің идеологиялық парасатын, әлеуметтік-экономикалық әлеуетін арттыруда айрықша кезеңге жол ашылатынын дәлелмен айтты.
Басқосуда Қазақстан Ұлттық жаратылыстану академиясының академиктері жаңа Конституцияның жобасын қолдайтынынын жеткізіп, мәтіндегі жекелеген баптарды жетілдіруге байланысты ойларын комиссия қарауына жолдағанын хабарлады.