«Жұбанов көктемі» фестивалі аясында ұйымдастырылған көрме өңір жұртшылығына ерекше мәдени оқиға ретінде ұсынылды. Экспозицияда алғаш рет көпшілік назарына ұсынылған сирек фотосуреттер, композитордың жеке пайдаланған бұйымдары мен қолжазбалары қойылды.
Көрменің ең құнды жәдігерлері қатарында Ахмет Жұбановтың дирижерлық фрагы мен 1934 жылы жасалған жеке домбырасы бар. Бұл заттар ұлы тұлғаның шығармашылық жолы мен рухани әлемінен сыр шертеді.
Шара барысында облыс әкімі Асхат Шахаров көрмені аралап, ұсынылған мұралармен танысты. Көрме ұлттық мәдениет пен тарихи құндылықтарды дәріптеуге бағытталған маңызды бастамалардың бірі ретінде бағаланды.