Елімізде 1 наурыз — «Алғыс айту күні» болып 2016 жылдан бастап атап өтіледі. Алайда, қазақ халқы ертеден кез келген игі іске, жақсы нәрсеге алғыс айтуды әдетке айналдырған дана халық. Алғыс айту арқылы адамдар бір-біріне қуаныш сыйлайды. Кезкелген мұңайып тұрған адам бұл сөзді ести сала, көңілі жібиді, жадырап шыға келеді. Осындай мерейлі күні мұғалжарлық тұрғындар өздеріне жақын, жақсылық көрген адамдарына алғыстарын жаудырды…
Сән Отыншина, «Көнек» ТҮК төрайымы
Алғыс күніне байланысты учаскелік полиция инспекторы, полиция майоры Тұрар Құдайбергеновке өз алғысымды білдіргім келеді. Өйткені әр түрлі жағдайлар орын алып, тәртіп бұзушылықтар болған кезде, бірден Тұрарға қоңырау шалып, тез жетуін сұраймын. Мәселені шешіп беруін өтінсем, бірден іске кірісіп, жауапкершілікпен орындайтынына шын риза боламын. «Апай, не болды, уайымдамаңыз» деп жылылығы жүзінен төгіліп, көмегін аямайтын Тұрарға мереке қарсаңында деніне саулық, жұмысына табыс, отбасына амандық тілеймін!