Аудан әкімдігінің мәжіліс залында облыс әкімдігі жанындағы Мемлекеттік рәміздер жөніндегі комиссия мүшелерінің қатысуымен семинар өтті. Семинарға Ақтөбе облыстық метрология департаментінің мемлекеттік инспекторы Ахметбек Альниязов, Ақтөбе облыстық ішкі саясат басқармасының бас маманы Тайман Мұхамбетов және аудан орталығындағы мемлекеттік мекемелер басшыларымен кәсіпорын өкілдері қатысты.⠀
⠀
Жиында Қандыағаш қаласындағы мекемелерде мемлекеттік рәміздерді пайдалану және қолдану барысында жүргізілген зерделеу және талдау жұмыстарының нәтижесі тыңдалды.⠀
Мемлекеттік рәміздердің пайдалану жағдайына жүргізілген мониторинг жұмыстарының қорытындысы бойынша анықталған кемшіліктерді уақытылы жою бағытында бірқатар ұсыныстар беріліп, әдістемелік көмек жадынамалары таратылды.⠀
Отырыс соңында аудан әкімінің орынбасары Ғалым Қобландин мемлекеттік рәміздерді еліміздің конституциялық заңына сәйкес дұрыс пайдалану, қолдану және насихаттау жұмыстары әрқашанда маңызды екенін атап өтіп, мекемелерде анықталған кемшіліктерді жою жөнінде тиісті тапсырмалар берді.
РӘМІЗДЕРГЕ ҚҰРМЕТ — БАСТЫ МІНДЕТ
