—Ұлыстың ұлы күні — Наурыз мейрамында дастарқанға сән беретін ұлттық тағам — Наурыз көжені биыл немерем Ақұлпан екеуміз бірге дайындадық. Наурыз көже жеті түрлі тағамнан дайындалады. Олар — қыстан қалған жылқының сүр еті, түйілген бидай, су, тұз, айран, өрік-мейіз, ұн кеспесі. Мерекеде Наурыз көжені тойып ішкен адам жыл бойы тоқ жүреді екен. Наурыз көжеге қосылған су – тіршіліктің белгісі, тұз – астың тәттілігі, ұн мен бидай – берекемен тоқтық, айран – молшылық пен дүниедегі тірлік, құрт пенмейіз – денсаулық пен күш, ет – сәттілік пен бақыттың белгісі болып саналады.
Біз алдымен қазанға су құйып, жылқының сүр еті мен қазы-қартасын салып, қайнатып алдық. Алғаш қайнағанда сорпаның көбігін алуды да ұмытпадық. 1,5-2 сағаттай қайнатып, етті сүзіп алып, дәндерді жақсылап жуып, бірінші бидайды салып қайнаттық. Дәміне қарай тұз салдық. Дәндер пісіп болды-ау дегенде кептірілген мейізді жуып, қамырдан кеспе дайындап, оны да қайнатып алдық. Қазаннан түсірілген еттерді ұсақтап турап, барлығын сорпаға араластырдық. Соңында көженің үстіне «ақ мол болсын» деп айран құйып, Наурыз көжені отбасы мүшелеріне ұсындық. Балаларым біз дайындаған көженің дәмді болғанын айтып, тауысып ішіп қойды.
Нұрғаным КЕСІКҚҰЛ