Енем немересіне «Бауырсақ» ертегісін оқып отырғаны сол еді, қызым: «Әже, бауырсақ пісіріп берші, ыстық күйінде жегім келеді», — демесі бар ма?! Әсте немересінің өтінішін жерге тастамайтын әжесі: «Айналайын әрине жасап беремін. Саған жасамағанда кімге жасаймын?! Қанекей, сен маған көмектесе ғой», — деп ас бөлмеге алып кетті. Қызым мәз болып, өзінің аспаз киімін киіп, әжесінің жанында жүгіріп жүр. Ал енем бірден бауырсақ пісіруге арналған құрамдарды дайындап, бауырсақтың қалай жасалатынын тәптіштеп түсіндіруде. Алдымен айранды, кейін тұз, шекер, жұмыртқа салып араластырды. Соңында ұнды електен өткізіп, қамырын дайындап, 30 минутқа бұқтырып қойды. Мақтадай болып үлпілдеп, ашыған қамырды тақтайға жайып, оны кесті. Ал қызым болса, әжесінің жанында өзіне шақталған тақтай мен оқтауды алып, нан жаюдыңқамыменжүр. Табағамай құйып, оны қыздырып, кесілген қамырларды салып, қызарғанша қуырып алды. Қызарып піскен бауырсақты жеп тұрған немересіне қарап, «Көрдің ғой, бауырсағымыз әп-сәтте пісіп шықты. Ата-бабаларымыз бұл тағамды көшіп-қонып жүргенде тез әрі жылдам дайындаған. Қазақтың дастарқанында әрқашан да бауырсақ тұрады. Ал ыстық бауырсаққа сары май жағып жесең, ол одан да өте дәмді болады», — деп маңдайынан сүйді.
Нұрғаным КЕСІКҚҰЛ
Әйгерім ДАРХАНҚЫЗЫ, жас келін: ЕНЕМНІҢ БАУЫРСАҒЫ – ДӘМДІ
