—Мен үшін заңгер болу — ең үлкен жауапкершілік, адамның сенімін ақтау. Көпшілік заңгерге келгенде өз проблемасын шешетін жол іздейді. Олар заңды толық білмеуі мүмкін, сондықтан дұрыс бағыт көрсетіп, мүддесін қорғау – біздің міндетіміз. Әрбір қателік немесе үстірт қарау адамның құқығына нұқсан келтіруі ықтимал. Сол себепті мен үшін ең бастысы – әділдікті қорғау, заңды қатаң сақтау және шынайы көмек көрсету. Заңгер тек құжатпен жұмыс істейтін маман емес, ол – адамдардың тағдырына араша болатын, сенім беретін тұлға.
Жас маман ретінде тәжірибемді күнделікті атқарып жүрген жұмысымнан жинап келемін. Біздің орталыққа түрлі мәселемен жүгінетін азаматтар бар: біреуі алимент өндіру бойынша, екіншісі жұмысқа орналасу немесе әлеуметтік жәрдемақы алу жөнінде көмек сұрайды. Осындай әрбір істі қарау – үлкен тәжірибе мектебі. Құжаттарды рәсімдеу, арыз-шағым жазу, құқықтық кеңес беру – кәсіби біліктілігімді шыңдайтын маңызды жұмыстар. Бұған қоса, заңнамалардағы өзгерістерді үнемі қадағалап, ресми дереккөздерден оқып, онлайн курстар мен семинарларға қатысып отырамын. Себебі заңгер әрдайым ізденісте болып, білімін толықтырып отырмаса, кәсіби бәсекеге қабілеттілігін жоғалтады.
Қазіргі уақытта Отбасын қолдау орталығында еңбек етемін. Мұндағы жұмысым отбасылық құқық пен әлеуметтік сипаттағы мәселелерді шешуге көбірек бағытталған. Көп жағдайда азаматтар алимент өндіру, бала құқықтарын қорғау, әлеуметтік төлемдер немесе еңбек даулары бойынша жүгінеді. Осындай істерде құқықтық көмек көрсетіп, қажетті құжаттарды әзірлеу арқылы тәжірибе жинап жүрмін.
Алдағы уақытта өзімді азаматтық құқық саласында көбірек көремін деп ойлаймын. Өйткені, бұл сала адамдардың күнделікті өмірімен тығыз байланысты: баспана, еңбек, мүліктік даулар, әлеуметтік мәселелер. Дәл осы бағытта жұмыс жасау арқылы халыққа нақты, практикалық көмек көрсетуге мүмкіндік бар. Сондықтан қазіргі тәжірибемді осы салаға бағыттап, кәсіби тұрғыда дамуды мақсат етемін.