Соңғы жылдары ауыл тұрғындары егіншілікпен айналысып, ауылшаруашылық саласын дамытып, жергілікті өнімдерді көбейтіп жүр. Ащысай ауылында тұратын жеке кәсіпкер Нұрболат Хамадинов ауыл аумағындағы суармалы жерлерді игеру мақсатында көктем айларында 5 гектар жерге қарбыз еккен еді.
Күзгі жиын-терін науқанында егіні бітік шыққан ол өнімдерін алыс-жақынды елді мекендерге саудалауда.
— Егістік алқабын тамшылатып суару әдісімен суардық. Шүкір, берекелі болды. Өнімдерімізді күн сайын Ақтөбе, Ембі, Қандыағаш қалалары мен шағын елді мекендерге, дүкендерге және жексенбі-сенбі күні өтетін жәрмеңкелерге жөнелтіп отырамыз. Өткен жылы 2 гектар жерге егін еккен едім. Биыл аумағын үлкейтіп, 5 гектар жерге тұқым септім. Келер жылы суармалы алқапты кеңейтуді жоспарлап отырмын. Қарбыз егу жұмыстарына уақытша ауыл жастарын тарттым, — деді диқан.
А.АЛТЫБАЕВА