Әне-міне дегенше биылғы оқу жылы да аяқталуға жақындады. Осы оқу жылында білім беру саласында көптеген өзгерістер орын алды. Бірнеше елді мекенде білім ошақтары бой көтеріп, есігін оқушыларға айқара ашты. Сондай-ақ кейбір ауыл мектептерінің материалдық және техникалық базасы жаңартылып, стандартқа сай жасақталды. Осы және өзге де өзгерістер жөнінде төменде тарқатамыз. Сонымен…
ЕКІ ЖЫЛДА 6 ЖАҢА МЕКТЕП САЛЫНДЫ
Соңғы екі жылда ауданда алты мектеп жаңадан салынып, пайдалануға берілді. Атап айтатын болсақ, Құмжарған ауылдық округіндегі Құмжарған негізгі орта мектебі, Талдысай ауылындағы 100 орындық, Алтынды ауылындағы 60 орындық, Ембі қаласындағы 320 орындық, Темір көпір ауылындағы орта мектептер. Бөлім басшысы осы жылы тағы да бес мектептің құрылысы аяқталып, пайдалануға берілетінін жеткізді.
Олар — Қандыағаш қаласы «Самал» мөлтек ауданындағы 600 орындық, «Финский» мөлтекауданындағы 600 орындық жайлы мектеп, Жағабұлақ ауылындағы 100 орындық, Ащысай, Көтібар батыр ауылдарындағы 60 орындық мектептер. Сондай-ақ Құмжарған ауылдық округінің орталығы Бірлік ауылынан 100 орындық мектеп балабақшасының жаңа ғимаратын салу жоспарланған. Бүгінде жобалық-сметалық құжаттаманы орындауға бюджеттік өтінім берілген.
— Біздің аудан халық саны жағынан облыстағы үлкен аудандардың бірі. Соған сай ауданда мектептердің көптеп салынуы қажет. Қаланың кейбір мектептерінде бала саны көп екені рас. Бүгінгі таңда аудан бойынша 37 мектеп жұмыс жасайды. Оның — 24-і орта, 11-і негізгі, 2-еуі бастауыш мектеп. Аталған мектептерде 12 789 оқушы білім алуда. Олардың 10 972-сі қазақ тілінде білім алса, 1 817-сі орыс сыныбында оқиды. Сондай-ақ аудан бойынша 37 мектептің 21-і шағын жинақты мектепке жатады. Оның 13-і типті, 8-і бейімделген мектеп болып бөлінеді. Аталған мектептерде 443 педагог 1 404 балаға білім беруде, — деді білім бөлімінің басшысы Бахраман Аманжол.
БАЛАБАҚША МӘСЕЛЕСІ ШЕШІЛІП КЕЛЕДІ
Бүгінде аудандық білім бөліміне қарасты 73 мекеме бар. Оның 37-сі мектеп, 32-сі балабақша, 5-еуі қосымша білім беретін ұйым. Аудандық білім бөлімінің басшысы Бахраман Аманжол аудандық білім бөліміне қарасты 32 балабақшаның 20-сы мемлекеттік, 12-сі жекеменшік екенін, сондай-ақ орта мектептердің жанынан жасақталған 22 шағын орталықтың барын айтты.
— Қазіргі уақытта аудан бойынша 3868 бүлдіршін мектепке дейінгі ұйымдарға барады. Оның 3320-сы балабақшаға барса, 626 бала мектеп жанындағы шағын орталықтарда тәрбиеленуде. 1-6 жас аралығындағы балаларды мектепке дейінгі ұйымдармен қамту 97,1 пайызды, 3-6 жас аралығындағы балаларды балабақшамен қамту 100 пайызды құрап отыр. 1-3 жас аралығындағы 201 бала балабақша кезегінде тұр, — деді аудандық білім бөлімінің басшысы Бахраман Қуанышұлы.
Оның сөзінше, өткен жылы аудан бойынша 370 баланы бақшамен қамтамыз ету үшін Ембі қаласынан 160 орындық, Қандыағаш қаласынан 210 орындық жекеменшік бөбекжай-бақшалар ашылған. Ал осы жылы Ақкемер ауылынан жаңа жекеменшік балабақша ашу жоспарланған.
СЕКЦИЯЛАР МЕН ҮЙІРМЕЛЕРГЕ 11 652 ОҚУШЫ ТАРТЫЛҒАН
Бөлім басшысы жалпы білім беруден бөлек оқушыларды қосымша білім берумен қамтудың маңыздылығының өзекті екенін тілге тиек етті. Аудандағы 37 мектеп пен қосымша білім беретін ұйымдардағы секциялар мен үйірмелерге 11652 оқушы тартылған. Тарқатып айтатын болсақ, 2024- 2025 оқу жылында аудандағы жалпы білім беретін мектептерде барлығы 233 үйірме мен секциялар жұмыс жасайды. Оларға жалпы саны 8955 әр түрлі жас аралығында оқушы қамтылып отыр. Сонымен бірге жалпы білім беретін мектептерден өзге қосымша білім беру ұйымдарында, Қандыағаш қалалық №1 Аула клубында, Ембі қалалық №2 Аула клубында, Жем қалалық №3 Аула клубында, Мұғалжар аудандық оқушылар шығармашылығын дамыту орталығында, Ахмет Жұбанов атындағы балалар музыка мектебінде 2697 бала түрлі бағыттар бойынша тәрбиеленуде.
— Қандыағаш қаласындағы Аула клубында 10 үйірме мен 6 секция 520 баланы, Ембі қаласындағы Аула клубында 10 үйірме мен 9 секция 622 баланы, Жем қаласындағы Аула клубындағы 5 үйірме мен 3 секция 255 баланы қамтып отыр. Ал шығармашылық орталық мен музыка мектебінде 1300 бала өз шығармашылықтарын шыңдауда, — деді бөлім басшысы.
МЕКТЕПТЕРГЕ 61 ИНТЕРАКТИВТІ ТАҚТА САТЫЛЫП АЛЫНҒАН
Бүгінде аудан аумағындағы білім ошақтарының материалдық базасын жаңғырту мақсатында бірқатар жұмыстардың атқарылып жатқанын да жеткізді ауданның бас педагогі. Оның сөзінше, 2024 жылы аудан мектептерінде жалпы саны 44 пән кабинеті жасақталған. Бұл үшін бюджеттен 326 млн 900 мың теңге көлемінде қаржы бөлінген. Атап айтсақ, Ы.Мұхамеджанов, А.Жұбанов атындағы, Жаңажол, Ақкемер жалпы білім беретін орта мектептері мен Жаңатұрмыс, Бұлақты, Ақсу, Еңбек негізгі орта мектептері жиһаздар мен және пән кабинеттерімен жасақталған.
—Ал 2025 жылы Талдысай, Құмсай, Жарық, Елек, Жаңатұрмыс, №4 Ембі қалалық, №5 Жем қалалық орта мектептерін пән кабинеттерімен және жиһаздармен қамту үшін бюджеттен 114 169 мың теңге бөлінді. Аты аталған ауыл мектептерінде қала мектептері секілді химия, физика, биология, кабинеттері жасақталды. Енді ауыл балалары аталған пәндерді тереңірек меңгеретін болады. Бұл жұмыс алдағы уақытта кезең-кезеңімен жалғасады. Сонымен бірге аудан мектептерінің материалдық базасы да жаңартылуда. 2024 жылы мектептерге 26 тоңазытқыш, 20 мұздатқыш, 19 электр плитасы, 10 жылу қазандығы, 15 сорғы, 12 генератор сатылып алынды, — деді Бахраман Қуанышұлы.
Бөлім басшысы бүгінде білім беру саласында жасанды интеллектті дамыту да алға қойылғанын жеткізді. Бұл бағыттағы жұмыстарды жүзеге асыру үшін аудан мектептеріне биылғы оқу жылында 61 интерактивті панель сатылып алынған.
ҚАУІПСІЗДІК –БӘРІНЕН МАҢЫЗДЫ
Бүгінде оқушылардың қауіпсіздігін қамтамасыз ету мемлекетіміздің маңызды міндеттерінің біріне айналып отырғаны сөзсіз. Қазіргі таңда ел бойынша білім беру ұйымдарында бейнебақылау жүйесі күшейтілуде. Аталған жұмыс аудан аумағында да атқарылуда. Аудандық білім бөлімінің басшысы Бахраман Аманжол аудан мектептерінде 992 бейнебақылау құрылғысының қондырылғанын айтты. Оның 725- і мектеп ішіне, 267-сі сыртына орнатылған.
— Аудан бойынша террористік тұрғыдан осал білім беру объектілерінің саны – 40. Біздің мақсатымыз – білім беру ұйымдарында оқушылардың қауіпсіздігін жүйелі қамтамыз ету. Осы орайда аудан бойынша барлық мектептерге 69 дабыл түймесі қойылды. Ал қауіпсіздік турникетінің саны – 23. Оқушылар мен мұғалімдердің қауіпсіздігін жалпы саны 49 күзетші қамтамасыз етеді, — деді бөлім басшысы.
774 МҰҒАЛІМНІҢ БІЛІКТІЛІГІН АРТТЫРУ – ЖОСПАРДА
Білім сапасының жоғары болуы мұғалімдердің біліктілігіне байланысты екені белгілі. Бүгінде сапаға қол жеткізу үшін мұғалімдердің біліктілігін арттырып, білімін жетілдіру мақсатында түрлі бағдарламалар жүзеге асырылуда. Аудандық білім бөлімінің басшысы Бахраман Қуанышұлы аудандық білім бөліміне қарасты білім беру мекемелерінің педагог кадрларының біліктілігін арттыру ҚР «Білім туралы» заңының 7-тарау 51-бабының 6-тармақшасына және «Педагог мәртебесі туралы» Заңының 1-тарау 7-бабы 12-тармақшасына сәйкес жүзеге асырылатынын мәлімдеді. Ұстаздар түрлі пәндер бойынша «Өрлеу» БАҰО және Педагогикалық шеберлік орталықтарынан біліктіліктерін арттыру курсынан өтеді екен.
Оның сөзінше, 2023 жылы 473 педагог, 2024 жылы 818 педагог біліктіліктерін арттырған. Ал 2025 жылы 774 мұғалімді біліктілігін арттыру курсынан өткізу жоспарлануда.
—Аудандағы 37 жалпы білім беру мекемесінде 1712 педагог жұмыс жасайды. Оның — 492-сі педагог-модератор, 380-і педагог-сарапшы, 393-і педагог-зерттеуші. Ал мектепке дейінгі ұйымдарда педогогикалық қызметкерлер саны – 370. Оның ішінде 113-і педагог-модератор, 40- ы педагог-сарапшы, 13- і педогог-зерттеуші. Қосымша білім бері ұйымдарында жалпы саны 72 педагог еңбек етуде, – деді аудандық білім бөлімінің басшысы Бахраман Аманжол.
6000-ҒА ЖУЫҚ БАЛА ТЕГІН ЫСТЫҚ ТАМАҚ ІШЕДІ
Биылғы оқу жылында аудан мектептері бойынша 6000-ға жуық оқушы тегін ыстық тамақпен қамтамасыз етілуде. Оның ішінде 5300-ден астамы бастауыш сынып оқушылары болса, 600- ге жуығы бес санат бойынша тегін тамақ ішетін оқушылар.
Бес санат бойынша тегін тамақтанатындардың қатарына мемлекеттік атаулы әлеуметтік көмек алуға құқығы бар отбасылардан шыққан балалар, мемлекеттік атаулы әлеуметтік көмек алмайтын, жан басына шаққандағы табысы ең төменгі күнкөріс деңгейінің шамасынан төмен отбасылардың балалары, жетім және ата-анасының қамқорлығынсыз қалып, отбасыларда тұратын балалар, төтенше жағдайлардың салдарынан шұғыл жәрдемді талап ететін отбасылардан шыққан балалар және білім беру ұйымының алқалы басқару органы айқындайтын білім алушылар мен тәрбиеленушілер жатады.
—Аталған санаттар бойынша оқушылар тегін ыстық тамақпен қамтамасыз етілуде. Сонымен бірге бастауыш сыныпта оқитын 5356 оқушы да тегін тамақтанады. Ал Сабындыкөл бастауыш мектебі, Темір-көпір ауылындағы №59 негізгі орта мектебі, Алтынды орта мектептерінде жоғарыда аталған санаттағы оқушылар жоқ болуына байланысты тегін ыстық тамақпен қамтамасыз етілген жоқ. Бірақ бұл мектептерде буфеттік тамақтану ұйымдастырылуда, — деді аудандық білім бөлімінің басшысы.
Білім бөлімінің басшысы мектеп асханалары толықтай қажетті ыдыс-аяқпен жабдықталғанын айтып, оның тазалығына да баса назар аударылатынын, қажетті заттарды жуу мен залалсыздандыру санитарлық-гигиеналық нормаларды сақтай отырып жүргізілетінін жеткізді.
—Мектептегі ауыз су режимін ұйымдастыру да аса маңызды мәселелердің бірі. Сол себепті мектептерде бракераждық және мониторингті комиссия мүшелері құрылып ыстық тамақтың сапасын, мөлшерін, құнарлығын тексеріп, үнемі бақылауда ұстайды. Мектептегі тамақтандыруды ұйымдастыру жүйесіне оқушыларды толық ыстық тамақпен қамтамасыз ету, тағамның нәрлілігі мен үйлесімділігін қадағалау, оқушыларға салауатты өмір салты ұстанымдарын үйрету, жағымды дағдыларды, салауатты өмір салтына қажеттілікті және тамақтану мәдениеті мен өзіне-өзі қызмет көрсету дағдыларын қалыптастыру кіреді. Аталмыш міндеттердің шешімін табу үшін бүгінде білікті қызметкерлер жұмылдырылды, — деді ол.
Мектептерде тамақтану жаппай оқу қоры қаражатының есебінен қамтамасыз етілген. Аудан бойынша берілетін ыстық тамақтың бір балаға шаққандағыорташабағақұны 603 теңгені құрайды. Мектеп асханаларының ас мәзіріне ет және балықтан жасалған тағамдар, көкөніс салаты, жеміс-жидектің 3 түрі, бал, сүт өнімдері кіреді. Оқушылардың тамақтануы сабақ арасында 10-15 минуттық үзілістерде ұйымдастырылады.
Нұрғаным КЕСІКҚҰЛ