Бүгінде ауылда кәсіпкерлікті дамытып, елді мекендердің экономикалық өрлеуі мен жаңа жұмыс орындарының ашылуына өз үлестерін қосып жүрген жандар жетерлік. Соның бірі — Жұрын ауылдық округінің тұрғыны, «Қасай» шаруа қожалығының басшысы Бекболат Исетов. Ол округке қарасты Тәжірибе ауылынан ірі қара малдарды бордақылау алаңын ашуды қолға алды.
Кәсіпкер өтініші негізінде аудандық «Атамекен» кәсіпкерлік палатасы мамандары ауыл тұрғындарымен арнайы кездесу ұйымдастырып, жобаның мәні мен мақсаты жан-жақты түсінділді. Іс-шараға аудандық кәсіпкерлік және ауыл шаруашылығы бөлімінің басшысы Бауыржан Жолмағанбет, аудандық жер қатынастары бөлімінің бас маманы Ұлан Тлеубаев, ауыл әкімі Рамазан Үргенішбаев қатысты.
Кездесу барысында тұрғындар тарапынан жобаға қатысты ұсыныс-пікірлер айтылып, оның артықшылықтары мен ықтимал тәуекелдері ашық талқыланды. Түсіндіру жұмыстарының нәтижесінде ауыл халқы кәсіпкерлік бастамаға қолдау білдірді. Жоба аясында жылына 1000 ірі қара бордақыланатын болады. Құрылыс жұмыстары аяқталған соң, қыркүйек айында нысанды іске қосу көзделіп отыр. Алдағы уақытта бұл алаңда 10- 15 ауыл тұрғыны тұрақты жұмыспен қамтылмақ.
А.МАНАСБАЕВА