Облыс әкімі Асхат Шахаров техникалық және кәсіптік білім беру мәселелері бойынша аппарат отырысын өткізді, — деп жазды «Ақтөбе» газетіне сілтеме жасаған mugalzhar.kz.
Жиын барысында Президент Жолдауында айтылған жұмысшы кадрларын өңірде даярлау, жаңа педагогикалық технологиялар мен сұранысқа ие дағдыларды оқыту, колледждердің материалдық-техникалық базасын дамыту, түлектерін жұмысқа орналастыру және басқа да маңызды аспектілер талқыланды.
Облыстық білім басқармасының басшысы Жайық Сұлтан атап өткендей, аймақта техникалық кадрларды даярлау 40 колледж базасында жүзеге асырылады, оның 24-і — мемлекеттік. Мемлекеттік тапсырыс бойынша 19202 жас білім алуда. Облыс бойынша колледж оқушыларының жалпы саны — 29 425. Кадрлар 94 мамандық және 139 біліктілік бойынша дайындалады.
Бүгінде машина жасау, өңдеу және құрылыс салалары сияқты сұранысқа ие мамандықтар бойынша 3335 адам, білім беру саласында—1020, қызмет көрсету саласында— 856, денсаулық сақтау және әлеуметтік қамсыздандыруда— 805, IT-технологияда 577 адам білім алып жатыр.
Сондай-ақ 28 колледжде дуалды оқыту енгізілді. Дуалды оқыту бойынша мамандарды даярлау көлік, тау-кен, тамақ өнеркәсібі, ауыл шаруашылығы, құрылыс, жеңіл өнеркәсіп, қызмет көрсету, энергетика және байланыс салаларында 54 мамандық пен 76 біліктілік бойынша жүзеге асырылады. Кәсіби кадрларды даярлау үшін колледждер облыстағы Дөң тау-кен байыту— «Қазхром» трансұлттық компаниясы» АҚ филиалы, «Қазпошта», «АМК Жарық» ЖШС, «Анвар», «Данай-Ақтөбе» сияқты кәсіпорындармен ынтымақтастықта жұмыс істейді.
— Ынтымақтастық туралы үшжақты келісім аясында облыстағы 844 кәсіпорында 4830 колледж оқушысы өндірістік тәжірибеден өтуде. Оның ішінде 4528 оқушы мемлекеттік тапсырыс бойынша білім алады. Тәжірибеде өзін жақсы жағынан көрсеткен түлектер осындай кәсіпорындарда жұмысқа орналасу мүмкіндігіне ие. Дуалды білім беретін оқу орындарында студенттердің саны жыл сайын 25 пайызға артып келеді. Өткен жылдың мәліметі бойынша олардың жұмыспен қамтылу деңгейі 83 пайызды құрады. Колледж түлектерінің жұмысқа орналасу көрсеткіші жақсы екенін ескере отырып, біз облыстағы барлық осындай оқу орындарындадуалды оқыту жүйесін енгізетін боламыз, — деді Жайық Сұлтан.
Сондай-ақ ауыл жастарын жұмысшы мамандықтарға үйрету үшін үш колледж жанынан мобильді оқу орталығы құрылды. «Колледж — жаңа мүмкіндіктер өрісі» өңірлік краудсорсинг жобасы аясында студенттердің ішкі академиялық ұтқырлығы енгізілуде. Жоба Ақтөбе сервис колледжі мен Қобда көпсалалы колледжі арасында жүзеге асырылуда. Сонымен қатар колледж оқушыларының құзыреттілік деңгейін және олардың еңбек нарығындағы сұранысын арттыру мақсатында оқу орындарын заманауи материалдық-техникалық базамен жабдықтау жұмыстары жүргізілуде. Бұл мәселені шешуге колледждермен ынтымақтасатын кәсіпорындар тартылған.
Өңірде сұранысқа ие кадрларды анықтау үшін кәсіпорын, мекеме басшыларының қатысуымен форсайт сессиялары да өткізіледі. Сондай-ақ жұмыс берушілердің қатысуымен облыста жұмысшы мамандықтардың жаңа атласы әзірленуде.
— Мемлекет басшысы Қасым-Жомарт Тоқаев Қазақстан халқына Жолдауында 2025 жылды «Жұмысшы мамандықтары жылы» деп жариялады. Осы уақыт аралығында техникалық және кәсіптік білім беру жүйесін реформалау жүргізіліп, ол елімізде сұранысқа ие техникалық кадрларды даярлауға бағытталады. Өңірдің кадрлық әлеуетін арттыру үшін еңбек нарығына мониторинг жүргізіп, салалар мен кәсіптер бойынша техникалық және жұмысшы кадрларға қажеттілік картасын әзірлеу керек. Жұмысшы мамандықтарын даярлауда облыстағы колледждер мен өндірістік кәсіпорындар арасындағы ынтымақтастық өте маңызды. Ол үшін әрбір оқу орны салалық кәсіпорындармен келісімшартқа отыруы қажет. Осындай ынтымақтастықтың арқасында маңызды мәселелердің бірі — түлектерді жұмысқа орналастыру шешімін табуда,— деді облыс әкімі өңірдегі кәсіптік-техникалық білім беруді дамыту туралы ақпаратты тыңдағаннан кейін.
Өз кезегінде, облыстық жұмыспен қамтуды үйлестіру және әлеуметтік бағдарламалар басқармасының басшысы Гүлназ Сисенова «Атамекен» өңірлік кәсіпкерлер палатасымен бірлесіп, 2026 жылға дейін өңірде жұмысшы кадрларының қажеттілігі анықталғанын айтты. Жалпы, жұмысшы мамандықтар бойынша мамандар тапшылығы 4812 адамды құрады. Негізінен, жүргізуші, электрик, автоэлектрик, слесарь, дәнекерлеуші, аспаз, сондай-ақ ауыл, орман, балық шаруашылығы, тау-кен және өңдеу өнеркәсібі, құрылыс, қоғамдық тамақтандыру, қызмет көрсету, ақпарат және байланыс, жол жөндеу салаларының мамандары сұранысқа ие.
Колледждер базасында жұмыс берушілердің өтініші бойынша жұмыссыздарды сұранысқа ие мамандықтарға оқыту үшін қысқа мерзімді курстар ұйымдастырылған. Биыл 5 колледж бен 12 оқу орталығында 20 мамандық бойынша 813 жұмыссыз азамат білім алуда.
Облыс әкімі қысқа мерзімді курстарда оқығандарды толық жұмыспен қамтуды, сондай-ақ ауыл тұрғындары арасында түсіндіру жұмыстарын жандандыруды, мүмкіндігінше электронды еңбек биржасындағы Skills Enbek платформасында жаңа мамандықтарға тегін оқытуды тапсырды.