Бүгін Қандыағаш өнеркәсіптік-экономикалық колледжінде құқық бұзушылықтың алдын алу бойынша «Тәртіпке бағынған құл болмайды» тақырыбында ер балалар жиналысы болып өтті.
Жиналысқа Мұғалжар аудандық полиция бөлімі бастығының орынбасары, полиция подполковнигі Жасұлан Утепов, Мұғалжар аудандық прокоратурасының аға прокуроры Нұрсұлтан Ахметкерей, Қандыағаш желілік полиция бөлімінің орынбасары, полиция подполковнигі Ержан Сырлыбаев, Қандыағаш қаласының мамандандырылған балалар-жасөспірімдер спорт мектебінің дзюдо бөлімінің аға бапкері Эдуард Саламат және Қандыағаш көлік прокоратурасының прокуроры Дәулет Ұзақбаев пен колледж директоры Жасұлан Оразханов қатысты.
Кездесуде колледж студенттеріне жасөспірімдер арасында қылмыс пен құқық бұзушылықтың алдын алу, кәмелетке толмағандардың бірін-бірі бопсалау, тонау, топтасып төбелесу деректерін болдырмау, білім мекемелеріне ұшты-кескіш заттарды алып келуге тыйым салу жолдары айтылды. Сонымен қатар студенттерге олардың құқықтары, ата-аналарының құқықтары мен міндеттері, сонымен қатар, жасөспірімдердің әкімшілік және қылмыстық жауапкершіліктері түсіндірілді.
Полиция өкілдері қазіргі кезде қоғамда орын алып жатқан түрлі әкімшілік құқық бұзушылықтардан сақтандыру, алдын алу профилактикалық шараларын жүргізіп, жаза басқан ер балалар мен оларға қолданылып жатқан жазалар, жасөспірімдер арасындағы орын алған қылмыстық фактілер жайында түсірілген материалдармен таныстырып өтті.
Ал аға бапкер әрі кәсіпкер Эдуард Саламат жасөспірімдерді спортқа шақырып, бос уақыттарын тиімді пайдалану керектігін, көп уақыты бар балалардың қылмысқа да жақын келетіндігін тілге тиек етті. Сондай-ақ қазірден мақсат қойып, кәсіп ашуға ниет білдіріп жүргендер болса, ақыл-кеңесін айтып, білгенімен бөлісті.