Жұрын ауылына газ келді. Ауыл тұрғындарының көптен күткен қуанышына, тілектері орындалған тұрғындарды Ақтөбе облысының әкімі Оңдасын Оразалин арнайы барып құттықтап, жылы лебізін білдірді. Көгілдір отынды бұрынғы Октябрь ауданының 1-ші хатшысы болған Кеңес Бірманов және Жұрын ауылдық округінің ардагерлер кеңесінің төрағасы Сақтапберген Майбасов іске қосты.
290 үйі, 1300-ден астам тұрғыны бар Жұрын ауылына көгілдір отынның берілуі ауыл тұрғындары үшін үлкен қуаныш. Өткен жылы да Жұрында бірқатар еңселі істер атқарылды. “Жұмыспен қамтудың жол картасы” бағдарламасы аясында 3 орталық көшеге асфальт төселіп, ауылдағы Қ.Жұбанов атындағы орта мектебіне күрделі жөндеу жұмыстары жүргізілді.