«12 тамыз — Халықаралық жастар күніне» орай Мұғалжар аудандық ішкі саясат бөлімі Жастар ресурстық орталығының қолдауымен және «Қандыағаш КВН лигасының» ұйымдастыруымен «Жазғы кубок — 2022» Жайдарман фестивалі өтті.
Облысымыздың әр өңірінен келген әзіл майталмандары мен жас командалар республикалық деңгейде өнер көрсетіп жүрген жайдарманшылар аудан жастарына керемет мерекелік көңіл-күй сыйлады.
Тартысты өткен сайыста ең жас әрі тәтті команда, өздері кішкентай болғанымен әзілдері салмақты Шығармалық академиясынан келген «Академия балмұздақтары» 3 орынды иеленді. Ерекше өзіндік стилімен баураған Мәртөк ауданынан келген «Бізде осы» жайдарман командасы 2 орынға ие болды. Бас жүлдені көрермендер мен әділқазы алқасының көзайымына айналған ардагер жайдарманшылар «Алтықарасу жастар құрамасы» иеленіп Мұғалжар ауданының «Жазғы кубок — 2022» иегері атанды.