Бүгінде ел бойынша туберкулездің алдын алу айлығы өтуде. Аталған айлық 24 ақпаннан 24 наурызға дейін жалғасады. Ауданның санитариялық мамандары өткен жылы ауданда туберкулез ауруының эпидемиологиялық жағдайы тұрақты болғанын хабарлады.
Мамандардың сөзінше, 2024 жылы аурушаңдық көрсеткіші 100 мың тұрғынға шаққанда 30,6 пайызды құраса, 2023 жылы бұл көрсеткіш 42,7 пайызды көрсеткен.
—2023 жылы ауданда туберкулездің 28 жағдайы тіркелді. Ал 2024 жылы бұл жағдай төмендеп, туберкулезбен сырқаттанып қалғандардың саны 20 болды. Дейтұрғанмен балалар, жасөспірімдер, жүкті әйелдер, халықтық осал топтары арасында туберкулез ауруының алдын алу — өте маңызды. Осы тұрғыда туберкулездің алдын алу, туберкулезге қарсы иммунитеттің дамуын қалыптастыру үшін медициналық қарсы көрсетілімдері болмаған кезде, жаңа туған нәрестелерге перинаталдық орталықтың (босандыру бөлімшесінің) егу кабинетінде туберкулезге қарсы вакцинациялау жүргізіледі. Нәрестенің ауру жұқтыру қаупінің алдын алу мақсатында перзентханада әр түрлі себептерге байланысты БЦЖ екпесін алмаған нәрестелердің жанұя мүшелері толық туберкулезге тексеруден өтуі қажет, — деді аудандық санитарлық эпидемиологиялық бақылау басқармасының басшысы Ерлан Мұратов.
Ол халық арасында туберкулезді ерте анықтау үшін медицина қызметкерінің жолдамасымен 15 жастан жоғары тұрғындар жыл сайын флюорографиялық тексерулерден өту қажеттігін де еске салып, балалар арасында туберкулезді ерте анықтау үшін туберкулиндік Манту сынамасы қолданылу қажеттігін тілге тиек етті. Сонымен қатар індеттің алдын алуда уақытылы тамақтанып, салауатты өмір салтын ұстану, дене шынықтыру белсенділігін арттыру, уақытында тынығу, темекі мен ішімдіктен бас тарту, жеке бас гигиенасын сақтау да өте маңызды.
—Туберкулез – ол инфекциялық ауру. Инфекция көзі науқас адам болып табылады. Туберкулез ауруына шалдыққан малға күтім көрсету кезінде де адамға жұғуы мүмкін. Көбінесе инфекция ауру адаммен жанасу болған кезде науқас сөйлегенде, жөтелгенде, түшкіргенде бөлінетін туберкулез бактерияларының ауа тамшылары арқылы сау адамға жұғу арқылы тарайды. Туберкулез ауруы салмақ тастау, тершеңдік, кеуде қуысындағы ауырсыну, жөтел, қан түкіру, жалпы әлсіздік, тез шаршау, ұзақ уақыт бойы дене қызуының көтерілуі сияқты шағымдардан басталады. Ең маңыздысы, әр азамат өз денсаулығыңызға ұқыпты болып, жоғарыда көрсетілген аурудың белгілері анықталған жағдайда ауруды асқындырмай, дер кезінде медициналық көмекке жүгіну қажет. Туберкулез диагнозы нақтыланған жағдайда дәрігердің ұсыныстарын сақтау, медициналық қызметкердің бақылауымен үзіліссіз ем қабылдау дертті толықтай емдеуге көмектеседі, — деді бөлім басшысы.
Н.АБАТ